Da u Soolangki D. Laloo
Knia Pyrthat, lehniam wa kyrpang kyntang
Soo raij- Soo langdoh chirup deilang.
Ha Raij Jwai yei lehniam da pyndep
Hei mon I khe u kynrad iow kyllep u sdep.
Chisien chisnem man i
Chwa wow poi ki Le yaw Soo Sngi.
Yieñ i ngooh i dem, i lehniam i knia
Yow imsuk imsaiñ u Niaw-wasa.
Langdoh ri Blai, kaam niam wa pyndep
Sdang dei chet ya ki tpu niam nadooh i step.
Chwa wow mih li knia na Yung Langdoh
Dei pait tpu wa ya sakhilang waroh.
Wasan wow khoh wakit ha ryngkhi
E wyrta chula tymbut luti.
Yow tip u bna ki khon ka Raij ka chnong
U ya wanlang wan bi ha Loomkyndong.
Tympang u pait ya ka duwan knia
Tyngkong tymbet wa pynyieñ wa chna.
Kyntang i man sa ki tiar knia hajrong
Yoosuk u pait, rukom pynthiah pynchong.
Bynta wa khatdooh yong ka
Da pyndep ha madan saam sla.
Khon ka Raij ka chnong wa yawanlang
Khynnah waheh, khmat chynrang.
Chwa wow yapra na madan saam sla
Le Raij- Le Langdoh wa yoh bhah yoh bynta.
Cha Raij cha chnong yoh ki u rah
Sarsuk u saam jar jiar i bhah.
Yow tyngkheiñ ya ki kaam niam ha kani ka sngi
Yutang yubat arliang em i.
Hapyrdi u Dolloi wow Kongwasan Chyrmang
Yieñ pyn-ap pynsñiaw hakhap u waboon walang.
Sarin ka lehniam Knia Pyrthat kamni
Malum mala e O haphi.
Kam wow kdar luti yei thij i pyrkhat yong phi
Kat ki Lok wa puræ yeini i sur poitri.
