Jowai: Ka AJYWO Central Body hapoh i yahkhmat u M H Dkhar kam u President deilang waka AJYWO East Jaiñtia Zone hapoh i yahkhmat u Heatermoon Ryngkhlem kam u President wa kiwi kiwa yahkhmat ka seiñ, ynne ka sngi 30 tarik kawa man leh ka lyngkhooh sngi yap wa 157 snem yong u Kiang Nangbah, u Khlawait yong ka Ri Jaiñtia, deiwa chah sdien pasi ha ka sorkar phareng kawa da synchaar lehbor yaka Ri Jaiñtia ha kitu ki por, ka seiñ da kynmoo tympang ko ya uwa yaleh laitlooid wa khroo yong ka RiJaiñtia deiwa lai booh syntu deiwa booh leh ya i ngooh Blai ha u Motdur yong u Kiang Nangbah, ha Khliehriat, ya uwa da chna da ka AJYWO Central Body deiwa ya krehlang waka District Administration, East Jaiñtia Hills District, ha u snem, 2016 kam ka dak wow pynsahnaam wei wow kynmoo maya ya utai u Khon Dapchynrang yong kaRi Jaiñtia.
Ha kani ka kynmoo warom yong ka AJYWO, ya i dap 157 snem i chah sdien pasi yong u Kiang Nangbah haka sorkar phareng, u M H Dkhar da klam tbian u hakhmat yong utai u motdur yong u Kiang Nangbah deiwa kynmoo tympang hajrong ki kaamwa khroo yong u Kiang Nangbah, u Khon Dapchynrang, kaRi Jaiñtia neibynta ka ri waka jaitbru kat hadooh dei mynsien da e u yow pynlaitlooid yaka ri waka jaitbru na i chah man broo ha ka sorkar phareng.
U M H Dkhar, da ong u leh wa ha-o han la ka Ri Jaiñtia da yoh ko ya i laitlooid na i kti ki dohlieh, tangwa kakam wa man kattæ hi, ka Ri Jaiñtia hi yachem ko chi boon ki eh ha kiwi won ki bynta kiwa ktah yaka Ri wa jaitbru. U tai uwa yahkhmat yong ka AJYWO, da pynkut u ya i klam wa tbiang yong oo deiwa duwai wei wow kyrpaad ya u Tre Kynraad wa booh wa thaw wow dang pynmih ya chiboon ki Kiang Nangbah yong ka jaitbru ha kini ki sngi wa katni, ki wow yaleh neibynta ka hok, ka lait looid, ka chongsuk waka roi ka paar yong u khon u hajar yong ka Ri Jaiñtia, wei da pynkut yaka lehwarom deiwa booh syntu lang ha kjat yong utai u Motdur yong U Kiang Nangbah.
Discussion about this post