Ka Seiñ Kyntu Seiñ Raij 12 Daloi da pynman ko yei kynmoo warom ya ka lyngkhooh sngi yap wa 159 u Khlawait ka Ri-loom Jaiñtia u Woh Kiang Nangbah ha ka yalang wa pynman ha pchem ka yung krehkaam yong ka ha Phramer Thadmuthlong C.
Ha kani ka sngi kynmoo warom ya u Woh Kiang Nangbah Khlawait wa da pynman ynnin ka sngi, da sdang deiwa ya pynhær ya ka lama ka Seiñ Kyntu Seiñ Raij 12 Daloi wei da bood won sa i lai booh syntu ha i dur yong u Woh Kiang Nangbah ha i yahkhmat u Womly Chyrmang, President ka Seiñ Kyntu Seiñ Raij 12 Daloi wei da bood won sa kiwi ki chnat Seiñ Raij waphær waphær.
Ya kani ka yalang da pynlai da u Womly Chyrmang, President ka seiñ deiwa ya emlang u General Secretary ka seiñ u Leki Saioo wa ki dkhot ka Seiñ Kyntu Seiñ Raij 12 Daloi, ki waheh wa manbei na ki chnat Seiñ Raij waphær waphær wei da ya emlang leh u President Rangbah ka Seiñ Raij Tuber u Harwis Phawa, u President ka Seiñ Raij Muthlong u Meliyo Lyngdoh wa kiwi kiwi de ki rangbah wa manbei na ka Seiñ Raij Muthlong.
Ha kani ka sngi da pynchongchit chooh chooh ya kani ka yalang da ki chaad tynre na ki chnat Seiñ Raij waphær waphær wei da yoh leh yei khana parom chaphang u Woh Kiang Nangbah da u Pet Dhar, General Secretary ka Seiñ Raij Nangbah.
