Jowai: Ha kani ka sngi Hat 16 Naikhynde noh chariñ ka sngi, ki khynnah ka Shlem Sikai Tynre kam ka dak i sñiawngooh sñiawburom yei yi yei yi iwa da yoh nei yah i tyoor luti kiwa sikai ya ki chaphang i tip niam wa ki rukom-dustur, dachim ki wow pynman ka yalang lehburom kyrpang ha Hall ka Seiñraij Secondary School.
Ya ki bynta yong ka program ha kani ka janmiet da pynlai da u Wandao Lakiang wa ka Manhaka Shylla heiwa kam wow kdar luti ya ki bynta wa chakhmat u Nijorki Sungoh da yieñ u wow siang ki kyntien ngoohblai ngoohsyiem, ka Synchar Dkhar da e ko ki kyntien pdiang burom katwa ka Salandaka Laloo won ha ka bynta wakut da yieñ ko wow e ki kyntien sñiawngooh.
U Pa Dolloi waheh Puramon Kynjin, hawa yieñ wow e ki kyntien ha khap u waboon walang heiyatoh wa kani ka sngi, da kdar nyngkong u wow pynsñiaw ya ki por kiwa oo dang man u kam uwi na kiwa sikai ya ki khynnah hapoh ka Shlem Sikai Tynre wei yaroh u leh ya kiwa sikai kiwa rap pateiñ neibynta i ekti yong ki yei por wei buit i bor hei wow tyoor u saiñdur ya ki khynnah chaphang i tip niam wa ka rukom-dustur.
Chooh chooh leh kdar u wow pachat ki kyntien e mynsiem ya ki khynnah dei wa ong, hawa leh yeiwon iwon emkaam u man kiwa yaichah, kiwa tip u ri yei burom-akor iwa da yoh sikai na ki por cha ki por wei banjoor u leh ya ki khynnah wow man kiwa sñiawsuk sñiawbang u pynlut por hei wow purae ya ki kot Niamtre.
Ha kani ka janmiet wow yoh kiwa sikai wa maya yei kmen i ka-it mynsiem ha kam kani ka sngi wakhroo wa kyrpang yong ki, neiliang ki khynnah dachim ki wow pynwyrngia pynchongchit ya kani ka janmiet da ki chaad, ki rwai wa kiwi kiwi ki rukom lehke chutia danda.
Discussion about this post