Ka Khliehriat Bar Association (KBA) ynne ka sngi da pynman ko ya ka lehkmen Advance Christmas ha ka kamra krehkaam ka Ephphatha Society (ka seiñ kawa kreh kyrpang neibynta ki bru kiwa em i duna ha i doh i pran), kawa em ha Ieng Swer Memorial English School Dkhiah West.
Ya kani ka lehkmen Advance Christmas da pynlai da u President ka Ephphatha Society, wei da pynchit pynwyrngia ya kani ka yalang da i rwai wa kyrpang na u Waiphangmi Bareh (uwa thlah) na ka chnong Khliehriat wa na u Kermiki Siangshai na ka chnong Moolamanoh (uwa duna ki bor khmat).
Da yoh leh ya ka khubor Christmas na u President ka Khliehriat Bar Association u Kerlang Ksoo, uwa da ong u wa ka Christmas da wanrah ko ya ka khubor i kmen, i kyrmen, i maya, i burom ya kini ki payu-para yong i kiwa em i duna ha i doh i pran lane kiwa em ka sap kyrpang, wei wa da khut u leh ya kiwa chong chnong ka East Jaiñtia Hills District wa toh u maya, u burom u yarap ya kini ki bru kiwa em ka sap kyrpang.
Da ong u leh wa ka KBA ka smat ko u yarap ya ki lada em ki ha i eh i khoo ha iwa hap ki wow leh man-ka-sngi khamtam lada em kiwa tyngkheiñ yei hok yong ki kawa toh u yoh ki.
Ha kani ka sngi da pynman leh yei ah Cake wa i e yarap sñiawbha Christmas cha ki kattu katni ngut ki bru kiwa em ka sap wa kyrpang da ki kymmor wa ka song poisa, kamjooh kam i e sñiawngooh ya ka Ephphatha Society kawa da kreh sñiawbha neibynta ki bru kiwa em ka sap kyrpang heiwa ka KBA da e yarap ko leh da ka song poisa cha kani ka seiñ.
Neiliang ka Ephphatha Society da e khublei kyrpang ko ya ka Khliehriat Bar Association kawa da wan lehkmen Advance Christmas wa ka Society kamjooh kawa da pynlut pynsep ya iwa emkaam waroh neibynta kani ka lehkmen Advance Christmas nadooh i baam i dih kamjooh ya u Cake wa ya ki e sñiawbha waroh.
Da pynwai ya ka lehkmen da i duwai na u Phrangki Rymbai.
