Ha ka sien wa nyngkong dooh, ka Dorbar Chnong Ialong, West Jaiñtia Hills District ha ka 15 tarik da lehkmen ko ya ka “Advance Christmas and Happy New Year 2022” deiwa ya sakhi lang da ki 3 tylli ki jait niam (Balang Ialong Presbyterian, Balang Catholic wa ki khon ka Niamtre) kam i dak yong i yatylli “Maya yei yong i dahi, burom yei yong kiwi”. Da pynbood leh da i e sñiawbha cha ki phawngut ki Khonswet/Duna ha i doh i pran wa i bor pyrkhat.
Da pdiang burom ya kani ka lehkmen da u Waheh Chnong ka Ialong, u T. Ram Phawa, da pynbood ya i rwai Gospel na ki khynroo khyllood yong ka Balang Ialong Presbyterian wei da yoh sa i klam na ka Sister Blinda Marwein kawa man leh kam ka Sister wa pait ya ka Fernando Home Care and Support Centre (Rehabilitation Centre for Women) kawa em ha ka chnong.
Ha kani ka janmiet da wai ya kani ka lehkmen da u chongknor, u Octomewot Lamin, Nominated MDC, uwa da ong wa ka chnong Ialong dang man sakhiat ko kawa ya tylli ha ki liang waroh deiwa em kam kini ki yachem khnang yow ye u wanrah yei bha i miat yong ka imlang sahlang ha ka pateiñ kawa daw wan, heijooh i por da kyntu leh ya ki paidbah u pteiñ ki u yatylli wei wow yajan neipor cheipor neibhah du i yatylli hi wa ye u wanrah yei jop, i kylla wa i roi i paar, kamjooh leh da e khublei Advance Christmas wa snem thymme u ya waroh ki khon yong ka chnong.
Ya kani ka lehkmen da pynkut da ki kyntien e khublei na u Waheh Chnong Ialong deilang wa i khublei Christmas ya waroh ki khon yong ka chnong.
Ha kani ka sngi da emlang leh u Arbor Hima Darnei, MDC 27-Saipung Constituency.
