Ka Lumbhahdakha Sport Social Educational and Cultural Club (LSSECC) Wahiajer ha ka 15 tarik uni u bnai da lehkmen ko yei dap 25 snem namo ka Silver Jubilee Celebration heiwa u Sniawbhalang Dhar, uwa man u Montri ka sorkar da wan u kam u kongsan hei emlang u Thombor Shiwat, CEM JHADC kam u symbood kongsan, u Ailad Bhoi, MDC JHADC, u Khrobok Passah, District Sports Officer, West Jaiñtia Hills District wa kiwi ki waheh wasian, ki manbei manpa wa chah khut sñiawbha.
Ka phang yong kani ka lehkmen Silver Jubilee toh kawa ong: “Promoting sustainable livelihood and resilience of young people for a better tomorrow.”
Ha ka yalang wa chongkun yong kani ka sngi hei pynlai da u Salonki Dhar, Chairman Dong Lumbhahdakha da yoh yei klam pdiang sñiawbha na u Batskhem Sumer, Chairman LSSECC, i rwai i chaad pliang na ki khyllood yong ka Dong Lumbhahdakha.
U Reform Lamare da khana pynsñiaw u hakhap ki waboon walang chaphang i parom wa tbian yong i lai luti ka Lumbhahdakha Sport Social Educational and Cultural Club, Wahiajer.
Ha kani sngi da saam leh ya ki tiar sahkynmoo namo Momentos cha kiwa kitkaam warim yong ka LSSECC, ki Appreciation Certificate cha ki khon khynroo yong ka Dong wa ki Certificate cha kiwa yalehbol yong ka dong. Chooh chooh wow pynsahkynmoo ya kani ka sngi da em leh i pynlait paidbah ya ka Thup Sahkynmoo (Souvenir) ka Silver Jubilee Celebration wei da wai ya u mooyurim (Foundation Stone).
U Ailad Bhoi hawa e u yei klam da ong u wa ka Sport e ko ya i chait i nang, pynwiar ko yei tlot i swe yong idæ wei man ko leh ka laad wow pynyoh kreh ya i, kamtæ ki bei ki pa wym hoi u khanglaad ki ya ki khon yong ki u chimbynta ki ha ki Sport wow lait ki na ki kaam wa sih ki kaam dakait.
U Thombhor Shiwat hawa e u yei klam yong oo da e u ka burom wei yaroh ya kiwa kitkaam ka Lumbhahdakha Sports Social Educational and Cultural Club wa da e ko i chakri i kyntu ya ka imlang sahlang ha ki 25 snem wa da lai chadien hadooh wa da man ko ka Club kawa paw ha ka chnong Wahiajer, wei da kyntu u leh ya kiwa kitkaam ka Club u nang kreh chitom chooh chooh ki hadooh wow yoh ko u lehkmen ya ka Golden Jubilee, Platinum Jubilee ha ki por kiwa daw wan.
Neiliang u Khroobok Passah hawa e yei klam da kitbok kitrwiang u ya ka Club wow nang ku ko chaphrang ha ki kaam wa bha yong ka wei da ong u wa ka Sport toh kawa e baam e khih e kreh ya i wei ye i leh u lai puræ ha ki liang Sports katni. Chooh chooh da ong u wa kiwa kwah u lai puræ ha ki Sports wow wan cha ka yung krehkaam yong oo khnang wow ye u batai chaphang kitea ki liang puræ wa yatoh wa ka Sport wei da kular u leh u yarap pynyoh ya ki laad yarap namo ki Grant ki Scheme kat i bor wa ye u neibynta ki Club kiwa kwah u ku chaphrang.
Neiliang u Sniawbhalang Dhar hawa e u yei klam da yaroh u ya ka Lumbhahdakha Sports Club deiwa ong wa ymye u len lada ka chnong Wahiajer mihkhmat ko cheiwon cheiwon ha ka yalehbol, ki bru wa pnah toh kiwa mih na kani ka Club. Chooh chooh da e mynsiem u wa i kitbok kitrwiang u ya kiwa kitkam yong ka Club wow nang ku chooh chooh ko chaphang wym hoi kut i krehkaam yong ka du chiteiñ luti donhi.
Kiwi tawan kiwa e yei klam toh u Winstone Mukhim (Secretary LSSECC), u Samson Lamare (Chairman Dong Lumbhahdakha), u Sanwotki Laloo (Waheh Chnong Wahiajer), u Lambor Dhar wa u E.S. Kharngi.
Neiliang u Sniawbhalang Dhar ha kani ka sngi da e sñiawbha u leh ya ka Scheme wa T. 50,000 cha ka Club. Neiliang yong ka SSLECC da e ko daka dorkhat ha u Sniawbhalang Dhar wow pynbiang ya iwa emkaam ka Club.
Da pynkut ya kani ka lehkmen da i klam khublei na u Paia Dhar, uwa jooh man kam u Chairman Dong warim yong ka dong Lumbhahdakha. Da e khublei u ya waroh nadooh ki khynnah ki manbei manpa ki khynnah khynroo yong ka dong, ki dkhot ka Club wa kiwi tawon kiwa wan cha kani ka lehkmen dap 25 snem.
Da e khublei kyrpang leh ya u Comforter Dhar (Member LSSECC) u wa da kreh chitom u pynyoh ya ka Scheme na ka Directorate of Sport and Youth Affairs Meghalaya Shilllong heiyatoh wei lut neibynta kani ka sngi.
