Ynne ka sngi u montri rangbahdooh ka ri, u Narendra Modi da pteiñ u wow lehkmen ya ka Diwali kamwa da leh ha ki snem wa dadep deiwa yachem wa ki chipai ka ri wei ynne ka sngi da yachem u wa ki chipai kiwa em ha Border Post, Longewala.
Neiliang u Modi da ekhublei u ya ki chipai waroh deiwa ong wa ki paidbah ka ri emlang ki chirup wa ki chipai neidaw i chakri i yong ki iwa khlem sangeh wow yada ya ka ri.
Heiyatoh wa ka Aatmanirbharta namo wow pynemkaam da ki tiar wa chna hapoh ka ri, u Modi da ong u wa da rai da ki bor chipai wa palat 100 jait ki tiar yaleh toh u sangeh noh wow thied ya ki na baar ri.
U Modi da kynmoo warom u leh ya ka yakhun thma ha Longewala deiwa ong wa kani ka yakhun u man ko kawa sah parom yanom heiwa da ye wow pynmih pyrthai ya i buit ka Pakistan wei kammon chah lehbeiñ ki bru ka Bangladesh ha kitu ki phaw snem wa dadep.
