I Video wa da pynmih da ka Netflix India ha YouTube chaphang i lehkmen Diwali wa da pynmih hei ktien Hindi wa ha i ktien Telegu wa da e pyrtuid Cherrapunji ki Diwali hei ktien Hindi wa Cherrapunji lo Deepavali hei ktien Telegu heiwa da pynyoo yei lehkmen Diwali ha Cherrapunji da kiwa chong chnong hanla pynthut u slap tangwa da yoh wow ya chong pait Netflix chi yung hanla joor u slap waroh chi snem leh da wanrah ko yei chrai na kiwa chong chnong ka jylla Meghalaya.
Kiwa boon nyngkong da ong ki wa ym toh wow pynemkaam yei pyrtuid Cherrapunji toh u pynemkaam yei pyrtuid Sohra wei da yah bakla chooh chooh ini i Video neibhah wa ki bru wa em ha ini i Video ym toh ki jaitbru napoh ka jylla wei ym em leh iyi iyi yong Khasi lait noh i rwai wa da rwai hei ktien Khasi.
Kini ki ar tylli ki Video da em palat 15 Million sien wa pait ki wei daw yahbakla i chiboon ya ka pyrthai yei rukom im ki bru ha Sohra, da ong kiwa boon.
Kiwa da pynsñiaw yei chrai hajrong ini da ong ki wa da pynemkaam bakla ya ka Ri-loom Khasi yow pynyoo yei thmu yong kiwi deiwa pynyoo yei wym em khlem da tih bniah bha wei kopsar da chna ya ini deiwa mutdur hi-eh khlem da pyrkhat yei sñiaw yong kiwi.
Lait na i rwai wa dei ktien Khasi ym de iyi iyi wa ong wa ini i thaw toh ha Sohra neibhah ki bru wa embynta ha ini i Video ym toh ki jaitbru napoh ka jylla kamjooh i riam i bait.
Kiwi da ong ki wa ini i toh i pyrchang wow pynyoo wa ha waroh kawi ka India man kam i jooh khlem da pyrkhat yei em boon ki jaitbru, ka dustur riti, ki ktien ki thylliej wei khlem da burom hi leh ya kiwi ki jaitbru kiwa da pynemkaam ha ini i Video yow pynkam toh kiwa chong chnong ka Sohra.
