Ka All India Radio, Shillong da lehkmen ko ya ka lyngkhooh dap 75 snem yong ka ha ka yalang wa da pynman ynnin ka sngi ha Shillong deiwa ya emlang leh ki wakreh warim wa ki sahep kani ka Radio Station.
Ya ka All India Radio Shillong da wai ha ka 01-07-1948 da u Lat ka Assam, u Akbar Hydari deiwa emlang u Montri Rangbah ka Assam, u Gopinath Bordoloi heiwa u Laxmanan Narayan da man u kam u Director-General ka All India Radio.
U Director wa Head of Office, AIR Shillong, u T. Hynniewta da khana u ya ki kaam wa da leh ka AIR Shillong ha ki snem wa da lai wow e yutip cha ki paidbah kamjooh wow pyn ka-it kasar heijooh i por. Da ong u wa ka AIR Shillong da seiñ ya ka kam ka seiñ kawa ye u chaniah kawa e yutip da kiwa tikna deiwa kreh chitom kiwa kreh nadooh kitu kiwa da chong-ngiah wa kiwa katni.
Da yaroh u leh ya kiwa kreh katni kamjooh ki warim kiwa da kreh hajrong ka thong ka All India Radio kam ka laad pathai khubor ka sorkar. Da kdaw u leh ya kiwa boon ki kaam wa da sdang da ka AIR Shillong neibynta iwa emkaam ki khynroo khyllood katni deiwa booh ya ki Programme wa ki khubor Online lyngba kiwa boon ki rynsan Social Media wa ki App.
Ka Chief Producer warim ka Doordarshan, ka Sweety S Diengdoh da pynsñiaw ko yei kmen wa ka AIR Shillong da pteiñ ko wow pynkmen wei wow e yutip ya ki paidbah ka Meghalaya. Da kyntu ko leh ya ka Station wow pteiñ yei kaam wa bha wow chakri paidbah.
Neiliang won ka Deputy Director-General Program warim ka AIR Shillong, ka Narimon Shadap da ong ko wa neidaw wa da mih chiboon jait ki laad pathai khubor katni, ka All India Radio toh u neh ko u man kam kawa e khubor wa tikna.
Ka All India Radio, Shillong daw pteiñ ko wow pynman ya kiwa boon ki jait yalang hadooh ka 01-07-23 kam chibynta kani ka lehkmen yei dap 75 snem kam ka ‘Public Service Broadcaster’ heiwa daw embynta lang leh ki paidbah wa ki khynnah skur ha kini ki yalang.
