Ka Balang Seventh Day Adventist ha chi tyllup ka pyrthai da pynemburom ko yaka Global Youth Day ynne ka sngi hajrong ka phang “Be the Sermon”, iwa mut u yalap yaka ktien u Blai deiwa pynyoo ki kaam e yarap yaki para bru haki rukom waphær waphær iwa yatoh neibynta i bha ka imlang sahlang.
Kamtæ neiliang ka North East Adventist Church Khliehtyrshi, West Jaintia Hills leh da pynemburom ko ya kani ka sngi deiwa lai e yarap yaki para bru haki thaw waphær waphær wei i bynta wa kongsan tam yong kani ka sngi toh i e snaam sñiawbha yong ka cha ka Blood Bank Jowai.
U Damon Shylla, uwi na kiwa sikai kani ka thaw puræ ong u wa ya kani ka Global Youth Day ka Balang da sdang pynemburom nadooh u snem 2013 deiwa chimbynta lang kiwa lai puræ ka North East Adventist College, kiwa sah Hostel hajrong ka yurim u man ki sakhi wow yalap daki kaam wa bha wa leh ki.
Da khana u wa ha kani ka sngi najrong i e snaam em leh chi bhah wa lai yasyllok cha ka thaw ri khonswet wa cha ka De-Addiction Centre wa em ha ka chnong Khliehtyrshi najrong wa e yarap haroh ki katu katni i emkaam yong ki.
Heijooh i por da lai yachem wei e yarap ki ya kiwa dooh wa duk deiwa sdang na kani hi ka chnong, najrong wa pynman haroh ki i pynkhooid yaki luti syngkieñ ynnin ka sngi.
Ka Dr. P. Shylla In-charge Jowai Blood Bank pynsñiaw ko i sñiawngooh yaka North East Adventist wada chim ko ya kani ka bynta wa khroo tam wow yarap yaki para bru kawa da jooh leh yeini i yarap neipor cheipor khamtam hawa ka Blood Bank em ko yei kyrdooh snaam.
Kamtæ yooluti ko wa ini i leh ka North East Adventist u man ko ka nongmuna ya kiwi tawan ki paidbah wow wan ki chakhmat.
Ha kani ka sngi napyrdi ki 48 ngut ki khynroo khyllood wa kiwa sikai wada wan chakhmat wow e snaam da chah jied 25 ngut kiwa 20 ngut ki chynrang wa 5 ngut ki kynthai.
