Ka Eastern West Khasi Hills District ynnin ka sngi da yoh ko wow lehkmen yei dap chi snem kam ka District ha ka yalang wa da pynman ha Madan Mot Tirot, Mairang Mission, Mairang heiwa u Lamphang ka Yung Dorbar Chna Aiñ ka jylla, u Metbah Lyngdoh da emlang u kam u kongsan deiwa synran lang u Montri ka chnat Water Resources ka jylla, u Brolding Nongsiej uwa da wan kam u symbood kongsan.
Kiwi kiwi won kiwa da ya emlang kynthup ki ya u MDC ka Mairang-Nongkhlaw, u Batskhem Ryntathiang, u MDC ka Pariong-Mawthadraishan, u Jambor War, u Syiem ka Hima Nongkhlaw, u Pa’iem P.M. Syiemlieh, u Syiem ka Hima Myriaw, u Pa’iem K. Syiem, u Syiem ka Hima Mawiang, u Pa’iem N. Syiem, u Deputy Commissioner ka Eastern West Khasi Hills District, u W. Nongsiej, u Superintendent of Police ka District, u M.B Syiem, ki sahep yong ki chnat waphær waphær yong ka sorkar jylla, kiwa yahkhmat chnong, ki dkhot ki SHG wa ki paidbah ka thaaiñ.
Neiliang u kongsan da pynsñiaw u yei sñiawkmen wow yoh u chimbynta hei lehkmen dap chi snem ka District, deiwa ong wa i yoh District man ko kawa mihsoh neidaw wa kyrchaan markylliang wei deiwa ya krehlang da waroh ki paidbah wa chong chnong, deiwa ong chooh chooh u wa i lehkmen yei dap chi snem ka Eastern West Khasi Hills District daw pynyoh ya ka laad ka kabu wow kynmoo yei kreh chitom yong kitu waroh kiwa da pynmankaam yei angnood ki paidbah ka thaaiñ wow yoh ya ka District kawa da wai ha ka 10-11-21.
U Metbah da ong u leh wa i chna ya ki District kiwa thymme man ko i thmu wow pynjan chooh chooh yei synchaar khadar cha ki paidbah wa chong chnong wei da pynsñiaw u leh yei kyrmen wow yoo yei pynku kyrdan yong ki yung krehkaam waphær waphær kiwa ha ka District ha ki por wa ki snem wow wan.
Ha kani ka sngi, u kongsan da yoh u leh wow wai ya kiwa boon ki kreh kam i chna sarok wei da pynlait u leh ya ka kot lakdop kawa da thoh yei lai luti ka District ha ki liang waphær waphær ha ka chi snem.
Da pynphooh pynphieñ chooh chooh ya ini i lehkmen da ki rwai ki chaad na ki bru wa em sap ka thaaiñ.
