Ynne ka sngi, ka Ephphatha Society, ka Society kawa kreh neibynta ki bru kiwa em i duna ha i doh i pran namo ki People With Special Needs (PWSN)) deiwa ya krehlang wa ka yung krehkaam ka District Horticulture Officer (DHO), East Jaiñtia Hills District, Khliehriat kam chibynta wow lehkmen ya ka National Festival of Tree Planting yow pynneh pynsah ya ka bei rymaw, da pynman yei thung da ki dieñ wa ki dieñsoh ha kpær yong ka Swer Memorial School, Dkhiah West.
Ha chwa wow thung ya kitai ki dieñ da pynman ya ka yalang wa tbian kawa pynlai da u Serious Dkhar, Statistician yong ka Ephphatha Society hei emlang ka W.C. Pariat, District Horticulture Officer, u Akbar Malang, Horticulture Development Officer deilang wa kiwa kitkaam ka Society.
Hawa e yei klam, ka W.C Pariat da ong ko wa i thung ya ki dieñ ki soh da man i iwa emkaam hadooh kattæ kattæ neibhah i em ki dieñ ki siej wa ki dieñ soh da yarap ko wow pynyoh yaka la-ær kawa khooid wow riñ mynsien khamtam ha kam kini ki por wa ki bru da pynsih roi ki ya ka rymaw hadooh wa da hap wow riñ mynsien da ka la-ær wa jakhlia iwa da wanrah næ pynman ya chiboon ki jait kjut wa boon jait.
Da ong ko leh wa i thung ya ki dieñsoh daw yarap ko chiboon wow pynroi yei yoh i kot yong ki bru wei kamjooh leh ya ka imlang sahlang yow ye u kyrchaan ya ki bru kiwa em i duna ha i doh i pran ha ka imlang sahlang.
Ka Pariat da kyntu ko leh ya kiwa kitkaam wa ki dkhot yong ka Society wow sumaar bha ya kini ki dieñ soh khnang wow man ki i myntoi yaka Society wa ka District hi waroh kawi.
Ka kyrwoh wa da phah da u H.U. Bang, Ephphatha Society.
