Jowai: Ka seiñ FKJGP Jaiñtia Hill da lehkmen ko yei dap 30 snem i em ka seiñ hapoh ka jylla heiwa ha ri-loom Jaiñtia da pynman daka yalang ha chnong Namdong ynnin ka 6 tarik, deiwa pynman leh ya ki yakob chaad tynre wa ki rwai tynre wei ha ini da wan chimbynta wei sakhi lang leh da kiwa chong chnong yong ka Nartiang, Namdong, Wahiajer, Mynsngad wa kiwi kiwi. Ya kiwa jop wa yoh nyngkong, wa ar, wa le da e leh daka buskit katwa ya kiwa ym poi cha ka thong da em i e sñiawbha.
U Generius Paslein uwa man leh u kongsan ha kani ka sngi da e khublei kyrpang u yaka lehkmen dap 30 snem ka seiñ FKJGP hapoh ri-loom Jaiñtia deiwa ong leh wa ka seiñ FKJGP man ko ka seiñ kawa emburom wa kawa yaar hapoh u pood u ang yong ka jylla Meghalaya yong i wei da e khublei u ya kiwa kitkaam ka seiñ hapoh ri-loom Jaiñtia, heiyatoh won waka yakob wada pynman da ong u wa man ko kawa yoosuk bha wow yoh u yoo yaki chaad wa ki rwai tynre. Da e khublei u leh ya kiwa chimbynta wa ya ki paidbah leh kamjooh, wei hawa e u ya i klam chaphang ka seiñ FKJGP wa ha i lai luti ko hapoh ri-loom Jaiñtia da ong u wa man ko ka seiñ kawa pait sakhiat yaka jaitbru.
Chooh chooh da e khubei kyrpang u ya kiwa seiñ yaka FKJGP wa hapoh ri-loom Jaiñtia kiwa da maad ya ki eh haki por wa ki seiñ ki yaka seiñ ha ri-loom Jaiñtia yong i.
U symbood kongsan u Linus Pale da e yaroh u yaka seiñ FKJGP Jaiñtia Hill kawa da ye wow pynman ya kani ka lehkmen dap 30 snem deiwa ong leh wa ka seiñ hi toh ka seiñ rangbah wa kawa pait sakhiat yaka jaitbru Ynñiawtrep Ynñiawskum wow yada leh yaka pateiñ wow wan wei kani ka seiñ toh kawa lai na ki snem cha ki snem wei da e khublei u ya kani ka seiñ wow nang kreh chitom neibynta ka jaitbru kawa khian paaid yong i.
Ha i klam won u Shngain Ksih uwa naka chnong Khliehriat heiyatoh wa i lai luti yong ka seiñ FKJGP Jaiñtia Hills, da ong u wa man sakhiat kawa kreh chitom neibynta ki paidbah ha ki por wa ki sdang ya kani ka seiñ wei da kyntu joor leh ya kiwa katni wow prat luti chooh chooh ha i kreh chitom neibynta uwa chong chnong wa khian paaid yong i wei da e khubei leh yei ye wow pynman ya kani ka lehkmen dap 30 snem ha ri-loom Jaiñtia Hills yong i.
Neiliang ka seiñ FKJGP Jaiñtia Hill, u President u Tuesday Lytep wa u General Secretary u Ricky Shylla da e khublei kyrpang ki ya ki dkhot yong ka seiñ FKJGP Jaiñtia Hills heiyatoh wa i lehkmen dap 30 snem yong ka seiñ. Wei kamjooh ya kiwa seiñ ya ka seiñ nadooh wa sdang hapoh ka bri u Ynñiawtrep Ynñiawskum hapoh u pood u ang yong ka jylla Meghalaya ka yong i yong phi wei kamjooh ya kiwa seiñ ha ri-loom Jaiñtia leh kamjooh.
Ya ka lehkmen wa heh wow pynkut ya ka lehkmen daw pynman ha kani ka 9 tarik ha Shillong.
Discussion about this post