Ka GHM Guest House kawa em hapoh ka chnong Caroline Colony, Jowai harood u sarok Jowai Bypass warim hajan ka yingkieñ Myntdu, ha ka 24 tarik uni u bnai da lehkmen ko yei dap 10 snem i lai luti wow chakri ya ki paidbah ha ki rukom waphær waphær nadooh wow pynbiang thaw sah thaw dem ya kiwa wan na baar, i pynbiang thaw lehkmen, i thaw khawai dawai, ki thaw kyndeh-ke neibynta ki khynnah, ki thaw baam nadooh ka Restaurant, Fast Food, ki thaw uiñke pyngngaad, heijooh i por leh wow e khih e kreh ya ki khynroo khyllood.
Ha ka yalang lehkmen wa da pynman ha kani hi ka thaw, da emlang u waheh chnong ka Caroline Colony, u Embhah Lyngdoh, u waheh chnong ka Tympang Iawmusiang, u Ajoy Lywait, kiwa ha-yung ha-sem u tre ka GHM Guest House, u G.M. Lamar wa kiwa chah khut sñiawbha.
Neiliang u tre hawa klam, khana u wa heipor wa sdang chna wym em mut u yow pynman Guest House tangwa kam ka thaw wow li sahke donhi teiñ teiñ, tangwa kat nang lai ki por nangmih nangwan i pyrkhat ha oo tæ pynchna u kajiak chisien hadooh wa man ko kawa man katni wa da ye ko u e myntoi ya kiwa boon ki bru kamjooh leh wot ya oo kam u tre thaw.
Neitæ da pachat yumut u leh heiyatoh ka kyntien wa ong “Wym em i wym ye u leh” deiwa pynkynmoo u yei rukom man kani ka thaw nachwa kawa man khloo, ka wym em sarok, wym em bordiñ, wei wot oo hi leh wym em poi pyrkhat u wa kani ka thaw loom u man ko cha ka thaw sah ki bru, ka thaw wan uiñke pyngngaad wa kiwi.
Weiwa katni da em chiboon i kylla haka, iwa da khriñ leh ya kiwa boon ki bru na kylleiñ ki jylla ka ri India wa kamjooh kiwa na baar ri.
Heiyatoh i pynchna pynmiat hei rukom waphær waphær ong u toh iwa da leh u dei bor i buit yong oo samen ha deilang i e mynsien kiwa ha-yung ha-sem.
Yei pyrtuid kani ka GHM Guest House khana u da e u dei pyrtuid wa sdang yong u Pa ka Bei wa i yong oo.
Kamtæ da e khublei haroh u ya waroh kiwa da embynta wow kyntu kynrong ya kani ka thaw yong oo ha ki rukom waphær waphær.
Ha kani ka sngi da wai leh yaka Website yong kani ka GHM Guest House da u waheh chnong ka Caroline Colony khnang yow suk ki paidbah u thooh u tip bniah hajrong yong ka, kamjooh leh da wai ya ka kchaaid (Artificial Waterfall) waka Fountain kawa em ha kani hi ka thaw da u waheh chnong ka Tympang Iawmusiang.
Ha ka yalang wa pynlai da u Damiki Laloo, da yoh leh yei duwai na u Rynsong Suting chwa wow ah Cake, neitæ i klam e khublei na u Homeland Lamar.
Discussion about this post