Ka Holy Cross Health Centre, Mairang ynnin ka sngi da yoh ko wow lehkmen yei dap 25 snem heiwa da wan wow sakhi da u Montri ka chnat i chait i khiah, u James P.K. Sangma kam u kongsan deiwa emlang u Principal Secretary ka chnat i chait i khiah ka jylla, u Sampath Kumar, u MDC ka thaaiñ, u Batskhem Ryntathiang, u Archbishop ka Shillong, u Archbishop Victor Lyngdoh, u Deputy Commissioner ka Eastern West Khasi Hills District, u Wilfred Nongsiej, ka Provincial Superior ka Holy Cross North Indian Province, ka Sister Linet, ka Administrator ka Holy Cross Health Centre, Mairang, ka Sister Jesse Jose, ki Doctor, ki sahep sorkar, kiwa yahkhmat chnong ka thaaiñ wa kiwi kiwi.
Ha i klam kam u kongsan, u James da e khublei u ya ki bor pynlai ya ka Holy Cross Health Centre, Mairang hajrong wa poi ki cha uni u moomær wa 25 snem i e chakhri ya ki paidbah wow sumaar hanla em boon i eh wa hap maad ki tangwa deiwa kreh chitom kiwa pynlai kani ka thaw e sumaar da yoh myntoi ki paidbah ka thaaiñ.
Hawa klam yei ya krehlang hapyrdi ka sorkar wa ki seiñ ki bru samen ha ki por wa da lai, u Montri da pynsñiaw u yei kyrmen wow yoh chooh chooh ya kiwi kam kini ki yatoh lok ha ki por wow bood kam chibynta i chakri ya ki paidbah wa chong chnong lyngba ka chnat i chait i khiah.
Da pynphooh pynphieñ chooh chooh ya kani ka lehkmen da ki chaad ki rwai na kiwa kreh ka Holy Cross Health Centre wei da pynkup burom ya ki kattu katni ki wakreh yong kani ka thaw e sumaar.
