Ha ka 4 tarik uni u bnai, ka Jaintia Network Society (JNS) da yoh ko u lehkmen pynemburom yei dap 4 snem kani ka Society deiwa emlang ki dkhot ha ka yalang wa da pynman ha chnong Mupliang kawa man ka thaaiñ wa krehkaam kani ka Society.
Ya ka yalang da sdang dei kyntien pdiang sñiawbha na kawi ka dkhot ka Society, ka L. Kyndiah wei da pynbood da i kyntien na u Assistant Waheh Chnong, u P. Phawa wei hadien ini da em i rwai pdiang burom da ki warep yong ka chnong Mupliang.
Ha kani ka sngi da em yoh leh i klam na ka Secretary yong kani ka Society, ka D. Nongtdu kawa da khana yei lai luti yong kani ka Society heiwa ya kani ka Society da sdang da ki 5 ngut ki chi lok kiwa man du ki khyntai kiwa wan na jar jiar i jait puræ puthi wei da rai ki wow sdang da kani ka Society haka 04-03-22 wei da yoh yei tipmit hapoh ka Meghalaya Registration Act.
Hadien ini da yoh i klam da ka President, ka P. Lamare kawa da khana chaphang ki kaam wa da kreh ki ha ka chnong Mupliang heiyatoh wa i rep yow tit wa tip kam u Oyster Mushroom wei da e leh ka e sikai wa boonjait kam i chna sboh, chna dawai pynyap khñiang wa kiwi tawon wei da lai yah leh cha ki thaw rep wa em ha kylleiñ ka Meghalaya wei yeini i kreh da kyrchaan da kawi ka seiñ wa tip kam ka IDeA the Ant kawa na Guwahati, Assam.
Ha kani ka sngi ka R. Passah kawa man ka District Social Welfare Officer da wan ko kam ka kongsan wei da e yaroh ko ya kani ka Society wa da khreh ko neibynta wow pynku yaka imlang sahlang khamtam heiyatoh wa i rep i riang.
Da batai ko leh chaphang ki kaam wa ka chnat Social Welfare da pait ko wa i lai luti yong ka kam ka DSWO ka West Jaiñtia Hills. Da pynkut ko yei klam deiwa e bok e nasib ko ya kani ka Society wow nang khreh ki yei kaam wa chakhmat.
Da yoh leh yei klam na u D. Rapsang, District Youth Coordinator (Nehru Yuva Kendra Sanganathan), Jowai uwa man kam u symbood kongsan yong kani ka sngi uwa da khana ya ki kaam waphær waphær wa ka yung krehkaam yong oo da e yarap ko cha ki khynnah khynroo kiwa em hapoh chnong poh thaw. Da kyntu u leh yaka JNS wow nang khreh chitom khnang yow nang ku chaphrang haka imlang ka sahlang.
Ha kani ka sngi da yoh wow pynlait yaka kot lakdop chaphang kani ka Society wei da saam ya ka cha kiwa em ha kani ka yalang.
Ha kani ka sngi da emlang leh ka P. Lyngdoh, Agriculture Development Officer Thadlaskein Block, ka Y. Phawa na ka chnat Social Welfare wa kiwi de.
Da pynkut ya kani ka yalang da ki kyntien pynwai na ka B. Dkhar kawa man kam ka Volunteer kani ka Society.
Discussion about this post