Ynne ka sngi kawi na ki seiñ wa kreh monsñiawbha ha Ri-loom Jaiñtia kawa da pawnaam bha, ka Jaiñtia Students’ Union (JSU) da lehkmen ko ya i dap 50 snem namo Golden Jubilee yong ka deiwa pynman ya i lehkmen ha Madan Jrisalein, Jowai wei ya ka yalang da pynlai da u Rikut Parein uwa man leh u President warim ka seiñ.
Ha kani ka sngi uwa e buit ka seiñ u muktiar CH Kyndiah da man u kam u kongsan, u Rudolf Laloo kam u symbood kongsan, wei u MDC ka Musniang-Rngad, u Phasmon Dkhar kam uwa chah khut sñiawbha deiwa emlang leh kiwi kiwi de.
U General Secretary ka JSU, u Treibor R Suchen da khana u wa i sdang ya ka JSU toh wow wanrah ya i roi ha ka Ri-loom Jaiñtia wei da sdang ya ka nadooh u 1972.
Da khana u ya ki parom wa da lai ka JSU nadooh i pynbait ya u pood u ang, wow dawa pynkylla ya ka Reservation Policy, wei katni dang pteiñ ya ki dawa wa kynthup ya ka ILP, ka B.Ed College ha Jowai, wa kiwi kiwi. Katni ka sorkar ym em u chimkhia ko ya ki mat dawa yong ki toh wow booh ya ki Border Police Outpost ha Zero Line yong u pood wa ka jylla Assam.
Da khana u leh ya ki kaam wa da leh ka JSU nadooh ka MPSC Cell, ka MBOSE Cell, ka Blood Bank wa kiwi kiwi.
U Dr. HH Mohrmen uwa da thoh ya ka kot chaphang u Kiang Nangbah, da khana u ya i por wa dawa ya ka Blood Bank heiwa da man u uwi na kiwa nyngkong dooh wow e snaam sñiawbha ha kani ka thaw. Heiwa ha kani sngi da pynlait leh ya kani ka kot chaphang u Kiang Nangbah kawa e pyrtuid ‘U Kiang Nangbah A Swordsman With The Stealth Of A Tiger’.
U Jersom Shylla uwa man u President ka seiñ hawa e yei klam da khana u wa i sdang lehkmen ya ka seiñ da sdang i nadooh u Wisu (Mar) uni u snem.
Da khana u wa ha ka JSU pdiang ko ya waroh khlem kheiñ ya ki niam, i yoh i laa wa kiwi kiwi.
Chooh chooh da khana u wa neiliang u Montri Rangbah leh da kular u wow chimkhia wow wanrah biang ya ka thaaiñ Labang Nongphyllut wa chong wa sah da ki Pnar chapoh ka jylla.
U Rudolf Laloo kam u symbood kongsan da khana u wa da psiah u cha ka seiñ kamwa 30 snem nachwa heiwa da khana u wa da jooh man u leh kam u President ka seiñ.
Da khana u wa ha u 1996 da khut ya oo cha ka yalang ha Tpep Pale heiwa da rai wow pynneh ya ka JSU wei ha kitu ki por da man ko ka seiñ kawa yohthiah wei ki kot ki sla yong ka seiñ em ki ha i yung wai ha Riat Iongpiah wei da pynlang poisa yow su ya ka bai yung yow yoh u chim ya ki kot ki sla.
Chooh chooh da khana u wa heitu i por da rai wow pynkhai im biang ya kiwi ki Unit wei neitæ da sdang ki u kreh ya ki kaam kiwa da pynmyntoi ya ka Ri-loom Jaiñtia khamtam neibynta ka Kiang Nangbah Government College.
Da ong u leh wa ki dkhot yong ka JSU man ki kiwa tipbru tipblai nadooh kitu ki por.
Neiliang u CH Kyndiah da ong u wa i em ka Ri-loom Jaiñtia toh neiwa em ka JSU, iwon iwon i tymbuiñ i duna toh kiwa yaleh u pyndap da ka JSU la ha u pood u ang, i chait i khiah wa kiwi kiwi.
Da ong u wa ki paidbah toh u e biang ki i kyrchaan ya ka JSU wei i chah beiñ ki seiñbhalang toh wa yieñ ki ya ki kaam neibynta kiwa boon wei kiwa ktah won ya ki kajiak ngut donhi.
Chooh chooh da ong u wa i yooluti na ka JSU neini chaphrang toh u wanrah ya ki yung krehkaam wow pait ya i eh i khor ka Ri-loom Jaiñtia.
Heijooh i por da ong u wa hawa leh neibynta kiwon kiwon ki kaam toh da ka luti kawa bha khnang wow yoh ya u soh wa ya i jop deiwa pyntikna wa im suk ka Ri-loom Jaiñtia.
Da ong u leh wa hawa dawa ya ka ILP toh wow yada ya ka jaitbru yong i kawa man ka jaitbru wa khian.
Heiyatoh wa i baam-tooh da kyrpaad u ya ka JSU wow yieñ waheh ki wow yakhun pyrchah ya i baam-tooh wei ymtoh wow ngop ha ka spah wa chipor donhi khnang wow tip ya ka JSU kawa ma ka seiñ kawa khooid kawa khlem i baam-tooh wei wow emkaam u kynmoo ya ki kyntien ka jaitbru wa ong ‘Im Dei Hok U Kamai Dei Hok’.
Ha kani ka sngi da yoh leh i klam na u A. Lypon uwa man u President ka Synjuk Waheh Chnong Ri Jaiñtia, u DH Pde na ka Synjuk Waheh Chnong Jowai, i klam na ki seiñ kam ka KSU, FKJGP, HYC wa kiwi.
Ha kani ka sngi da pynlait leh ya i sur yong i dap sanphaw snem ka seiñ wei da pynphooh ya ka da i sur, i chaad wa i ah ya u Cake dap 50 snem ka seiñ.
