Ka Khliehmynkrem Riatsiatsim Social Club, Jowai kawa da sdang nadooh u snem 1996, hynnin ka 27 tarik u Kmaichonglad da lehkmen ko ya u moomer i lai luti wa 25 snem pura yong ka haka yalang wada pynman ha Khliehmynkrem Community Hall hajrong ka phang pyrdi “Ka jingiatylli”.
U S. Shadap Ex-General Secretary hawa pynsñiaw ya ka parom yong ka Club, ong u wa ha u snem 1994-95 da em i wym bait de i shynchaar khadar yong ka Mynthong Club Jowai, kawa da booh hei maa ya ki paaid wa chong chnong kamtæ ki kattu katni ki waheh, ki seiñ manbei da yalang paidbah ki wei da rai deiwi i yumut wow seiñ noh yaka Club deiwa e pyrtuid Khliehmynkrem Riatsiatsim Social Club.
Neitæ da chna yaka riti synchaar yong ka Club wei da yoh leh i tipmit naka sorkar heiwa da lai bait lai ryntih khlem em iwon iwon i thut.
Da sdang u yoh yaki Scheme pynroi ha u snem 1998 ter ter wa kynthup lyngba u MP Rajya Sabha, Lok Sabha, naki Montri Rongbah ka jylla, naki MLA, MDC wa kiwi.
Dei kyrchan u MLA warim u S. Mulieh ha u snem 1999 ka Club da sdang ko u chna yaka yung Club, neitæ da seiñ ko yaka skur wa pyrtuid ka Khliehmynkrem Lower Primary School Jowai wei da yoh i tipmit naka sorkar ha u snem 2001.
Chooh chooh u S. Shadap ong u wa kamwa man kattæ dang lai ki chakhmat wow yoh i tipmit ya u waheh chnong na ka JHADC khnang wa ka shynchaar khadar hapoh chnong u lai bait lai ryntih ko.
U kongsan yong kani ka sngi u S. Mulieh Ex- MLA hawa klam da pynsñiaw u yei kmen hajrong i dap 25 snem kani ka Club wei da ong leh wa kani ka sngi u man ka wow sah kynmoo yanom.
Da pynkynmoo haroh u wa toh oo wa pyntipmit ya kani ka Club cha ka sorkar, najrong wa pynyoh haroh ya kiwa sikai heipor wa dang man u kam u Montri sorkar.
Ha ka yalang wa pynlai da u L. Lakhon uwa da pachat haroh ya ki kyntien pdiang burom, da yoh i duwai naka A.M. Suchiang, i rwai naka seiñ kynthai katwa yaki kyntien e khublei da yoh na u H. Suting.
