Ka Kiang Nangbah Govt. College Jowai ynne ka sngi da lehkmen ko yaka lyngkhooh sngi seiñ namo ka Foundation Day ka College kawa da lai luti la 57 tylli ki snem hajrong wow saam yei stat i tip cha ki khynroo khyllood ha ki kyrdan waphær waphær, wei yeini i lehkmen da chimbynta lang nadooh kiwa sikai kiwa kreh ha kani ka College wa kiwa lai pure.
Ka Principal yong ka College, ka Dr. E.M. Blah hawa klam da pynsñiaw ko yei sñiawngooh ya waroh kiwa embynta u seiñ u sdang ya ka College neibhah lyngba i kreh chitom yong ki, ka College da nang ku wei da man ko kamwa man katni.
Kani ka College jooh yoh yarap ko leh naka RUSA, neitæ da yoh yei tipmit leh naka NCTE kam kawi napyrdi ki 5 tylli ki thaw puræ hapoh ka thaaiñ North East yow sdang yaka Integrated Teacher Education Program kawa 4 snem ka wow sdang noh ym slem de.
Wei kamwa ka College da yoh tipmit ko naka NAAC ha u 2021, ngait skhem ko leh wa kiwa sikai kiwa lai puræ, kamjooh waroh kiwa kreh ha kani ka College u nang kreh chitom chooh chooh ki khnang yow nang yoh tipmit ko na kiwi tawon ki bor.
Hawa klam da pynkynmoo haroh ko wa ya kani ka College da pynkylla pyrtuid cha ka Kiang Nangbah Government College ha u snem 1983 dei pyrtuid u khlawait ka ri.
Neiliang u Dr. S.R. Lyndem ong u wa katkam i lai luti kani ka College, da chong hok u yoh ko i tipmit naki bor waphær waphær.
“Ki 57 tylli ki snem wada lai wei ka thaw puræ yong i kat dang slem kattæ nang khlan tangwa hei rta bru won kat dang slem kattæ nang tlot,” da ong chooh chooh u.
Wei ha kam kani ka sngi yooluti u wa ka yung ka sem yong ka Kiang Nangbah Govt. College u nang pynthymme ko lyngba i yakrehlang, i kreh chitom hajrong kammon u tei yow nang pynkhlan chooh chooh yaka College.
Kiwi won wa klam kynthup ya u IQAC Co-ordinator, u Dr. J. P. Sharma, ka S. Syiem, HOD Education waka A. Mawa, HOD Botany.
Ha kani ka sngi lehkmen da em leh i yakob pynriam syntu namo ka Flower Arrangement, i pynkup burom yaki ar ngut kiwa lai puræ kani ka College wa da poi ki chakhmat haka Result wa pynbna ini wa dep wa kynthup yaka Salansi Pohleng, B.Sc Mathematics waka Shandakabiang Suchiang, B.Sc Botany.
Neitæ da pynkup burom leh da ka naam Silver Jubilee Award yaki kattu katni kiwa sikai wei da pynchongchit chooh chooh ya kani ka sngi dei rwai i chaad na ki khynroo khyllood wa lai puræ.
Discussion about this post