Ka yung krehkaam ka KVK Jaiñtia Hills da lehkmen ko ya ka Poshan Abhiyan wei da pynman leh yei thung dieñ ha ka 17 tarik uni u bnai ha KVK Campus wa em ha Moopun, Wahiajer.
Ha ka yalang wa pynlai da u Dr. D. Pasweth, Senior Scientist & Head, KVK Jaintia Hills da pdiang sñiawbha ya ki warep wei da klam u leh chaphang i lehkmen ka Ministry of Women and Child Development ya ka lyngkhooh snem wa san ka Rashtriya Poshan Maah 2022 nadooh ka chi tarik uni u bnai hadooh ka 30 tarik uni u bnai kam chibynta ka National POSHAN Abhiyan kawa man ka thong krehkaam ka sorkar pyrdi yow pyndooh yei duna baam kamjooh yei yap thngan.
Da klam u leh chaphang ka Poshan Abhiyan kawa da sdang da u Prime Minister ka ri ha ka 03-03-18 ha Jhunjhuna District ka Rajasthan wei i thong ko toh wow pynbha noh yei rukom baam ki khynnah kiwa dang khai khynroo, ki kynthai wa punkhon, kiwa dang e bu khon deilang wa ki khynnah wa hapoh 6 snem i rta.
Da ong u leh wa da wanrah ya kani toh yow heh u san ki khynnah deiwa biang yow lait ki u sti khamtam kiwa em 0-6 snem i rta kamjooh yow lait nei duna snam kiwa em 6-59 bnai, kamjooh i duna snam ki manbei wa ki khynthai wa em nadooh 15-49 snem yow lait ki leh wow kha khon da kiwa duna khia.
Ka Amita Phawa, President ka Ledong Village Organization, Wahiajer da e ko yei klam wa tbian hajrong i emkaam i rep wei kamjooh yeiwa chem ko.
Da pynman leh yei e sikai kammon wow yarap ya ki warep kamjooh ki kynthai warep hajrong le tylli ki phang nadooh i rep kpær, rukom song ya ki mar rep nadooh ki jhoor wa ki soh deiwa pynchlur leh ya ki wow sdang u thung jhoor pyn ha yung hi wei yeini da sikai da ka A. Dympep, Subject Matter Specialist (Agril. Extension), KVK Jaintia Hills.
Neiliang u Dr. R. Suchiang, Subject Matter Specialist (AH & Vety), KVK Jaiñtia Hills da e sikai u hajrong i emkaam u baam pylleiñ.
Da yoh leh yei sikai hajrong ki “Bio-fortified Crops” iwa da e da ka D. Lyngdoh, Programme Assistant (Tech), KVK Jaintia Hills.
Neiliang ki warep da yoh ki leh wow yaklam wa kini ki Scientist ha kani ka yalang.
Da pynkut ya ka yalang deiwa saam chieñ cha kiwa chimbynta.
