Lehkmen ka Little Angels Secondary School yei dap 25 snem

Ka Little Angels Secondary School, Jowai ynne ka sngi da sdang ko yei lehkmen dap 25 snem i lai luti heiyatoh wow e i tip i stat lyngba i puræ puthi, wei ya kani ka lehkmen da wan wai pyrda da u Deputy Commissioner ka West Jaiñtia Hills District, u B.S. Sohliya hei emlang ka DSEO West Jaiñtia Hills, ka A.P. Syiem, kiwa sikai, ki khynnah skur, ki bei ki pa, kiwa chah khut sñiawbha wa kiwi de.

Ha kani ka sngi u Deputy Commissioner da wai haroh u yaka kamra Library wa da chna pynheh kamjooh leh yaka Digital Classroom yong kani ka skur.

U DC hawa e yei klam kam u kongsan chim u leh ka laad wow pynsñiawthooh heiyatoh waka Election MP kawa da jan wei kyntu u leh wow ya chimbynta da waroh wow lai thap Vote wei ymtoh wow em kiwa chah ieh chadien.

Heiyatoh wa kani ka lehkmen dap 25 snem ka skur won, yooluti u wow nang ye chooh ko u kaap sam chaphrang neibynta u e chakri wa rap miat rap bha hei puræ puthi, wei u man kam ka nongmuna ya kiwi tawon.

Heijooh i por ngait skem u wa lyngba kani ka sngi sdang, i lehkmen neini chakhmat leh u man kawa lai bait lai ryntih.

Neiliang ka DSEO, ka A.P. Syiem ong ko, i puræ puthi i stat i tip man iwa emkaam ha kini ki sngi khnang yow ye u lai hei im wa bha wa miat.

Yaroh ko leh yei lai luti kani ka skur kawa da nang ku neipor cheipor kamjooh wa da ye ko u pynmih ki khynnah wa lehbha wa da poi chakhmat ha ki Result SSLC.

Wei hajrong kini waroh e khublei ko ya kiwa sikai wa ki bor pait bor pynlai ka skur wa lyngba i kreh chitom lang yong ki yoh ki khynnah yaka Result wa miat kamjooh i stat i tip wa biang.

Ha kani ka sngi ka skur da pynkup burom ko leh ya kiwa sikai nyngkong ha kani ka skur, kiwa sikai wa jooh rah naam lyngba ki Award waphær, ki khynnah skur wa puræ nyngkong dooh, ki khynnah wa lehbha haka Exam SSLC yong u snem 2023, najrong kiwi won ki burom waphær waphær wa da pynkup ha kani ka sngi.

Chwa ini da yoh i duwai na u Dr. B. Plain, i klam pdiang naka Wanbok Sayoo kam ka Headmistress, i khana yei parom tbian yong ka skur da ka Principal, ka Emlut E Laloo, i klam na u Dr. Elvee S Marbaniang, Working President School Managing Committee wa kiwi.