Ka Meghalaya ynne da lehkmen ko yei dap 51 snem ka jylla haka yalang wa da pynman ha U Soso Tham Auditorium, Shillong heiwa u Lat ka jylla, u Brig. (Dr.) B. D. Mishra (Retd.) da wan u kam u kongsan katwa u Chief Secretary, u D P Wahlang da man u kam u symbood kongsan.
U Lat hawa e yei klam da e khublei u ya ki paidbah ka jylla deiwa ong wa man ko i sarong ya oo wow embynta ha kani ka sngi wa kmen deiwa pynkynmoo wa 51 snem nachwa ka Prime Minister warim ka India, ka Indira Gandhi da chongknor ko ha ka yalang wow pynbna kam ka jylla wa pura ya ka Meghalaya ha madan Polo, Shillong. Da ong u wa da pynmankaam yei angnood ki jaitbru Khasi, Jaintia wa Garo.
Da ong u wa ka yakhih wow yoh yaka jylla Meghalaya toh kawa em yurim bha wei da booddien hok dei yakhih paidbah, deiwa em kiwa yahkhmat wa chynna jngai yow tipmit yei man kyrpang ka riti dustur wa i rukom im ki bru kani ka jylla kawa i ye i wow ong toh ka yong i katni.
U Lat da kynmoo warom u leh ya kiwa yahkhmat nachwa kam u B B Lyngdoh, u Edwin Bareh, u Captain W A Sangma, u H S Lyngdoh, u Professor G G Swell, u Stanley Nichols Roy, u H Hynniewta, u Wilson Reade, u Professor R S Lyngdoh wa kiwi de kiwa da yaleh wow pynneh pynsah ya i man kyntang nadooh ka thaw ka bhaw, ka riti dustur, ka kiten u thylliej wa i hok wow synchaar ya idæ. Wei da ini i chynna jngai yong ki katni da yoh i ya ka jylla kawa ye wow pynhun yeiwa angnood i.
U Lat da ong u leh wa ha kini ki 51 snem ka jylla da lai ko chakhmat wow ku ha ki kaam rep, ki kaam uiñke suwari, i pynmih bordiñ, ka puræ puthi, ka Information Technology kamjooh i pynemkaam ya ki mar pohkhyndaw deiwa stat yow pynman ya ka Meghalaya kam ka jylla wow bood kiwi ha ki kaam pynroi liang wanang.
Da e khublei u leh ya waroh kiwa yoh ya ka khusnaam Meghalaya Day Excellence Award ya ki kaam wa lehbha ki ha ka imlang sahlang.
Neiliang u Chief Secretary, u D P Wahlang da ong u wa ka jylla ri-loom yong i kawa miat da chong hok wow lehkmen ya ki snem wa lait nei um snaam i yakhih wow yoh jylla. Da ong u wa ha ka 21-01-1972 da pynneh i nadooh ka riti dustur, ka ktien thylliej, ki sur ki rwai, ki baam tynre wa waroh ki angnood ka jaitbru, da yoh mynsien ki nadooh wa yoh ya ka Meghalaya kam kawi na ki jylla wa pura hapoh ka ri India.
U Chief Secretary da ban joor u ya iwa da leh wow pynbha ha ki kaam puræ puthi, i chait i khiah, i pynku ya ki thaw wa palatsor, ka rep ka riang, i pynbiang ya ka Mobile Network kamjooh ka bordiñ.
Ha kani ka sngi, u Lat da saam u leh ya ka khusnaam Meghalaya Day Excellence Awards 2022 cha 18 ngut kiwa kreh sorkar yei chakri paidbah ki wei da saam u leh ya ka khusnaam cha kiwa jop ha ka yakob phet Meghalaya Day Run wa pynman da ka Directorate of Sports & Youth Affairs.
Ha kani ka sngi da pynbna leh ya kiwa jop ya ka khusnaam Meghalaya Day Awards 2023 heiwa ya ka U Tirot Sing Award 2023 ha ki kaam Arts and Culture da yoh da ka Sweetymon Rynjah, ka Pa Togan N Sangma Award 2023 neibynta ka Social Service da yoh ka Dr. Jennifer V Basaiawmoit katwa ka U Kiang Nangbah Award 2023 neibynta ka Sports da yoh u Klingson D Marak.
Da pynbna leh ya kiwa jop ya ka Governor Police Medals for Meritorious Service neibynta u snem 2023 wei kiwa jop man ki kamni: U Additional Superintendent of Police, u Shabbir Sayeed Dkhar, MPS, u Deputy Superintendent of Police (DSB), u Vincent Nengminza Sangma, MPS, u UBSI Iailamlang Iongi Jyrwa, u UBSI Sean Stanford Lywait, ka WPSI Renu D Momin, u Havildar Mewan Roy Pakma, u Havildar Amplias Synnah, u BN/975 Alphonse Lyngdoh wa u Fireman, u Pyarson R Marak.
