Jowai: Ka Dorbar Chnong Moosalyngkat Jowai, ha kani ka kynti da kynjoh i lai luti ko cha u moomer dap 50 snem wei hajrong ini i dap 50 snem kiwa chong chnong da chim ki wow sdang yei lehkmen haka yalang wa tbian deiwa bood ryntih leh yaki kyndon ka sorkar yow yada na u COVID-19.
Ha kani ka jooh ka sngi ka Moosalyngkat da wai ko leh ya u moo yurim ka Community Cum Indoor Sports Hall, heiwa u Dolloi ka Elaka Jowai u Puramon Kynjing da man u kam u kongsan, u Prof. P.M. Passah Founding Secretary ka Dorbar Chnong kam u symbood kongsan hei emlang ki kattu katni kiwa chong chnong nalor kiwa chah khut sñiawbha wa kiwi kiwi.
I lai luti yong ka Moosalyngkat da sdang naka Street Light Committee wa hapoh i yahkhmat u (L) Rev. L. Gatphoh ya ki bru wa chong wa sah ha kani ka thaaiñ, heiwa da ya pyrkhat ki yei emkaam u booh Street Light neibynta u chngaaiñ i lai i wan ki paidbah, wei hadien ini da ki jooh hi ki bru wa man dkhot haka Street Light Committee da thung kam ki dkhot yong ka Local Committee ha u snem 1970.
Nadooh katai ka por, ka Moosalyngkat da pyntyllung ko yei rukom shynchaar khadar, wei da chna yaki Committee waphær waphær neibynta i roi i paar kamjooh i bha i miat ka chnong waki paaid wa chong chnong kamjooh.
Kamtæ hadien wa ka Ladthadlaboh da yoo biang ko yaka Moosalyngkat kawa haap hapoh u pood u ang yong ka wow man noh kam ka Dorbar Chnong yow synchaar wei pait yei bha i miat, ha u 2016 u Dolloi ka Elaka Jowai da pynskem u ya u Ricky Tariang kam u waheh chnong wei da tipmit leh yaka Moosalyngkat kam ka Dorbar Chnong.
Ka Secretary yong ka Golden Jubilee Celebration ka R. Shylla hawa e yei parom tbian ka Moosalyngkat da khana ko leh wa i sdang wow pynyieñ chrot yaka Community Hall toh haka 05-03-2016, dei yarap kyrchaan poisa kiwa mihkhmat wa kynthup ya u Prof. R.C. Laloo MLA, ka Wansuk Syiem MP Rajya Sabha, u V.H. Pala MP Lok Sabha, u J.U. Nongrum, Moonlight Pariat wa u Andrew Shullai kiwa man ki MDC.
U symbood kongsan u Prof. P.M. Passah da kyntu u wym toh u mylliñ ya kiwa yahkhmat wada lai chakhmat u Blai, tangwa toh u kynmoo yaki hapoh dohnud dei maya neibhah wa ki toh kiwa kyrchaan wa prat luti.
Heiyatoh wa ka synchaar khadar chnong da pynsñiaw u deiwa ong, “I man i kiwa dooh nong neibhah wa i cheini ym em bud i yaki kyndon ka Ministry yong ka sorkar bei neibynta u pynku yaka chnong ka thaw ha sor wa ha nongkyndong yow yoh ya boon i myntoi. Neibhah haka sorkar India em ka Ministry watip kam ka Panchayati Raij Ministry kawa boon ka mang tyngka yow e chaki chnong ki thaw, neibynta ki nongsor wa nongkyndong”.
Ong haroh u wa hei sakhiat ha kam kini ki por i stad i tip da lai bha ko chakhmat wymtoh u randien, tangwa toh u yabeh u tur chakhmat.
Neiliang u kongsan u Puramon Kynjing Dolloi Elaka Jowai ong u, lada i ym em i ya kiwa synchaar chnong, yaka Bri u Ynñiawtrep ym tipmit yaka kam kawi naka jaitbru wa biang ka bor iktiar haka imlang sahlang.
Ong haroh u, kiwa yahkhmat chnong toh kiwa yarap yaka chnong ka thaw hawa kiwa chong chnong em ki yei duna, i eh i khoo næ i bakla.
Heijooh i por kyntu haroh u wa hawa leh ya iwon iwon emkaam u pynchong yurim bha neibhah boonsien hawa pyrkhat yeiwa bha wym jooh mutdur wa hadien wa leh ya iwa bha daw em i sñiawsih.
Ha kani ka sngi yow Cake dap 50 snem yong ka Moosalyngkat da ah da u K. Kyndait Founding E.C. Member haka yalang wa pynlai da u A.N. Gatphoh.
