Ka Village Organization (VO) ka Mukhla Nongrim da lehkmen ko yei dap 3 snem deiwa pynman da ka Mini Fete ha pchem ka yung dorbar ka chnong Mukhla Nongrim ha ka 15 tarik uni u bnai yow pynmih poisa neibynta ka VO hi.
Ha kani ka sngi da wan wow sakhi lang da u MLA ka thaaiñ, u Wailadmiki Shylla kam u kongsan wa u Ailad Bhoi, MDC Mukhla-Wahiajer Constituency kam u symbood kongsan deiwa emlang u Dr. Brightstar Langbang, BDO Thadlaskein Block, u Donbok Nongpoh uwa man u Block Project Manager MSRLS, u waheh chnong ka Mukhla Nongrim, u Secretary Chnong wa ki dkhot ka Executive Committee.
Neiliang ka President ka VO, ka Marlang Sumer da batai ko chaphang i lai luti wa ki kaam yong ka VO wei ha kani ka sngi da wan wow chimbynta da ki 25 tylli ki Self Help Group kiwa em hapoh ka chnong Mukhla Nongrim kiwa haap hapoh i pait wei pynlai yong ka VO Mukhla Nongrim, wei kini 25 tylli ki SHG em ki 10 ngut ki dkhot ha kawi kawi.
Kini ki SHG da yoh yarap ki na ka VO hei dur yong ka ram wei ini da yarap ko ya ki wow seiñ kreh wei wow kamai deiwa ri mrad yow ye ki u pynlai yaw.
Neiliang u Wailadmiki ha kani ka sngi da e yarap u cha ka VO T. 1 lak kawa da e kti cha ka President wa ka Secretary yong ka VO khnang wow yoh ki u pynemkaam yow myntoi chooh chooh ka VO.
Ha kani ka sngi da pynchongchit deiwa pynman ya ka ‘One Day Football Tournament’ wa da pynman da ka ka Mukhla Nongrim Sport Club heiwa da em ki 8 tylli ki Sport Club kiwa em ha ka chnong Mukhla Pyllun kiwa da chimbynta heiwa yei naam jop da rah ka Mukhla Shohshrieh Sport Club deilang wa ka song-poisa wa T. 3000 deiwa jop ya ka Mootepkhla Sport Club kawa da yoh T. 2000.
Ha i jooh i por da pynman leh ya ka Fashion Show da ki manbei wa ki dkhot ka VO wei heipor janmiet deilang wa ka yalehke Drama.
