Ha ka 10 tarik uni u bnai, ka Dorbar Chnong Namdong-B, West Jaiñitia Hills da lehkmen ko yei dap 50 snem ka chnong namo ka Golden Jubilee wei da wan wai pyrda yaka da u MLA ka thaaiñ uwa man leh Montri ka sorkar, u Sniawbhalang Dhar, deiwa emlang u Thombor Shiwat, CEM ka JHADC, u Evening Tron, MDC JHADC, u Rev. Fr. Dominic Kympat wa kiwi ki bru waheh ka thaaiñ.
Ya ka yalang da pynlai da u Karlik Siangshai uwa man u Chairman ka Golden Jubilee Celebration heiwa da yoh yei klam maitphang na u waheh chnong, u DS War uwa da khana wa ka chnong Namdong-B da kynjoh ko 52 snem katni tangwa neidaw wa em ka khlam COVID-19 ym em yoh wow pynman yei lehkmen pynemburom heiwa da leh ha uni u snem.
Da khana u leh yei parom wa tbian chaphang ka chnong wa ha ki phaw snem kiwa nachwa da em kiwa chong wa sah ha ki loom kiwa tip katni kam ka chnongrim Mukhnang, neitæ da lai sah ki ha ka thaw wa tip kam ka Lumlakhiat wa Nongrim Pampylleiñ wei neini da yut ki wei da lai sah ha u loom wa em ka Parish Namdong katni wei heini da roi, tangwa syndet syndet ha u snem 1956-57 ka khlam kawa joor da wan ban ko wei ki bru da yap ki hadooh wa kani ka chnong da jan wiar ko wei da em leh ki kattu katni kiwa da lait im wei da yut ki cha Namdong-A kawa katni.
Kamtæ ha u snem 1964 u Woh Khung Mulat uwa da khlaad noh da wan chong chnong u ha uni u loom uwa ka Namdong-B da em ko katni, wei ha u snem 1965 bood sa ki chi kurim ka bei Silbiana Thubru wa u pa Lowis Myrchiang dep te bood sa ki kur Dkhar, kur Pale wei kamtæ nadooh u snem 1966 chaneiñ, kiwi kiwi da wan chong chnong ki. Kamtæ ha u snem 1970 da e waheh chnong noh ya ka chnong wei da khut noh ya ka kam ka Namdong-B.
U CEM ka JHADC, u Thombor Shiwat kam u symbood kongsan da pynhær u yaka lama i lehburom 50 snem wei da ong u wa ini i yoh wow lehkmen ya u moomær wa 50 snem ka chnong toh deiwa lai luti wa jrong wei da maad chiboon i eh wei da wanrah yei yatylli hapoh ka chnong.
U Sniawbhalang Dhar kam u kongsan da yaroh u ya kiwa pynlai chnong nadooh kiwa nachwa hadooh kiwa katni neibhah lada ym em i kitkhia wa i sñiaw mantre ya ka chnong, ya kani ka sngi ym ye wow pynman yaka.
Da ong u leh wa ka chnong Namdong-B toh kawi na ki chnong kawa ye u ku ha kiwa boon ki liang, ki khon khynroo ka chnong kiwa boon kiwa da stat da tip wa kiwa chemphang wei da ong u leh wa ka Namdong-B toh ka yit dur yong kani ka thaaiñ wei man ko leh ka chnong wa em hapyrdi yong kiwi won ki chnong kiwa marjan wei man ko leh ka chnong kawa ka sorkar da kyruiñ khmat wow booh ya ki yung krehkaam wa boon jait kamwa man katni neibhah wa em ka thaw wa biang wa kawa suk ya ki paidbah ka thaaiñ wow wan.
Ha kane ka sngi u Sniawbhalang Dhar, da wai paidbah u yow mooyurim sahkynmoo yei dap 50 snem ka chnong wei da yoh leh yei duwai kyrkhu kyrdoh na u Rev. Fr. Dominic Kympat, Parish Priest Namdong Parish.
Da pynkup burom wei da e leh da ki tiar sahkynmoo cha ka Bei Silbiana Thubru kawa man ko kawa chong chnong wa nyngkong ka Namdong-B hadien u Woh Khung Mulat uwa da khlaad noh.
Da pynphooh pynphieñ ya kani ka sngi da ki chaad ki rwai na ki khon ka chnong wa ka yalehbol na ki manpa ka chnong kiwa da kynjoh cha ka rta kawa 50 snem chaneiñ, wei da yoh yei e khublei khaddooh na u Secretary Chnong.
