Lehkmen ka NEHU yaka International Women’s Day

Shillong: Ka skurbah North Eastern Hill University, Shillong da lehkmen ko yaka sngi kyrpang ki kynthai namo ka International Women’s Day da ka yalang pachat yumut kylliang yei sñiaw ha Conference Hall ka Administrative Block, Shillong ynnin ka 6 tarik deiwa em ki kynthai wa pawkhmat kiwa da pynsñiaw yeiwa sñiaw ki ha kani ka sngi.

Ka Dr. Ampareen Lyngdoh, MLA, Laitumkhrah-Malki Constituency, kawa man kam ka kongsan ha kani ka sngi da ong ko wa emkaam wow pynkupbor yow pynku ya ki khynthai haka imlang sahlang kamtam haka kaam seiñ pyrthai wa dang duna bha ki kynthai. Da kyntu ko wow ya kular ki wow chim yei kitkhlieh kawi ka kynthai u yarap ko ya kawi ka kynthai wei wow kyrchaan katkam wa emkaam.

Da ong ko leh wa i sikai chaphang ka chait ka khiah ha ki kynthai toh kawa duna bha hapoh ka jylla iwa ka sorkar jylla hap chimkhia ko. “Ki kamram toh u man ko i jooh ya ki chynrang wa kynthai, wei du hadien ini u yoo yei kylla yow wanrah yei man salonsar.”

Da kyntu ko leh ya ki kynthai wym toh u sarom u yaklam heiyatoh wa i hok ki kynthai wei wow yatylli.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U Prof. BBP Gupta, Vice Chancellor I/c, hawa e u yei klam da ong u wa da ya emlang yow lehkmen yaka International Women’s Day kawa da pynman neidaw wa sdang yakhih ki 1500 ngut ki kynthai na America kiwa da yakhih yei hok ki kynthai namo ka Gender Equality Movement. Kani ka yakhih da poor ko cha waroh kawi kani ka ri. Da ong u leh wa i lehkmen ya kani ka sngi toh ya kiwa da ye kini ki kynthai wow yoh yei hok yong ki. Chooh chooh da ong u wa ha NEHU ym chah iwon iwon i lehbeiñ ya ki kynthai.

Ka Prof. Monica Agarwal, Director, NIFT, Shillong kam ka symbood kongsan da ong ko wa i pynkupbor yaki kynthai daw yah ko leh cha ka synchaar khaddar wa khlan wei emkaam leh u pynkhlan yaka khayi pateiñ. Da ong ko leh wa kam ki bru toh u burom kylliang wei u em leh i laitlooid hei pyrkhat pyrdaiñ yow em ka sñiawsarong wa da chimbynta yow pynku yaka ri.

Ka Phikaralin Wanshong, Entrepreneur, Shillong da man ko kamwa da chah khut sñiawbha wei da khana kammon wow man kiwa jop hawa seiñ khih.

Ha kani ka sngi da emlang leh u Registrar ka NEHU, ki Professor, Lecturers wa kiwi ki bru wa paaw ha ki kaam puræ puthi.