Ka NESFAS deiwa ya krehlang waka The Locavore da pynman ki ya ka lehkmen yow pdiang sñiawbha ya u Kre uwa man u mar rep warim uwa da sdang rep biang katni hapoh Meghalaya wei ya kani ka tamasa da e pyrtuid “Celebration of Millet- an Indigenous Peoples’ Heritage of Meghalaya” kawa da pynman ha yung krehkaam ka NESFAS haka 15 wa 16 tarik uni u bnai yow pynyoo rong yei myntoi wa yoh na u Kre uwa tip kam u Millet hei kiten pharæng kam chibynta ka United Nations International Year of Millets 2023.
Ha ka sngi wa ar da em kiwa chimbynta wa wan na Jaiñtia Hills, East Khasi Hills wa Ri-Bhoi deilang wa ka MLA ka East Shillong, ka Dr. Mazel Ampareen Lyngdoh kam ka kongsan.
Neiliang u Phrang Roy, Founding Chairperson, NESFAS, da khana u chaphang kani ka lehkmen deiwa pynsñiaw leh yei kmen yei emlang u Chef Thomas Zacharius ha kini ki ar sngi deiwa ong wa ki kwah ki wow pynphooh pynphieñ yei baam kam chibynta wow pynsñiawthooh paidbah yow pynneh pynsah yei baam yong rim wei kiwa khlan wa chkeh ha kini ki por wa kylla i rukom man ka suiñ bneiñ deiwa pynchlur leh wow pynemkaam yei stat ki warim wa i stat yong ka juk wa katni.
Ha kini ki ar sngi da yoh wow yaklam hajrong ki kaam wa boon jait kiwa yatoh wa i rep ya u kre wei kammon wow lai chakhmat yow pynchlur u baam ya u kre.
Kiwa da chimbynta da yoh ki leh yei chah sikai kammon wow chet ya ki jait baam wa pynemkaam da u kre kiwa da em 12 tylli ki jait deiwa pynyoo u Chef Zacharius deilang kiwa napoh ka jylla kam ka Jemyleen Greta Diengdoh, Naphi Samanbha Mawroh, Benny Paia Dondor Wankhar, Ahmedaki Laloo wa Artet Kharsati.
Ka Bibiana kawa da rep ya u kre da slem bha da khana ko kammon wa da kylla ini nadooh wa dang khian ko hadooh wa heh ko wei katni da kmen ko wow yoo wa da rep biang ya u kre neibhah wa e u boon ki myntoi ya kiwa baam ya oo.
