Ka North East Adventist University (NEAU) da lehkmen ko yaka Cultural Unity Day 2023 kamwa jooh leh man-u-snem deiwa pyntoh pyntne ka Sociology Department deiwa ya krehlang wa kiwa yahkhmat kiwa klam ya kiwa boon ki jait ktien kiwa lai puræ heini wei ya kani ka lehkmen da pynman haka 31 tarik u Naichiphaw ha kani hi ka skurbah wa em ha Khliehtyrchi, West Jaiñtia Hills District.
Ya kani ka lehkmen da wan wow wai da u MLA ka Jowai Constituency, u Wailadmiki Shylla kam u kongsan heithaw u Montri Rangbah, u Conrad Sangma.
Neiliang u Vice-Chancellor, u Dr. Paul Bhaggien da pynsñiaw u yei sñiawngooh ya u MLA uwa pteiñ wow kyrchaan ya ka University nadooh wa sdang.
Da ya emlang leh ha kani ka sngi wa u waheh chnong ka Khliehtyrchi, u Kitbok Rymbai, ka A.P. Syiem, DSEO wa u K. Passah, DSO.
U Wailadmiki hawa e yei klam da yaroh u ya kani ka lehkmen wa wanrah yei ya sñiawthooh wei yatylli hapyrdi ki khynroo khyllood yow ye u im deiwa ya burom kylliang ya ka dustur riti wa i tre i thied yong jar jiar ki jaitbru.
Da yaroh u leh ya ki phaw phaw snem wa kani ka thaw puræ da e chakri ko neibynta ka Ri-loom Jaiñtia wei da kular u leh wow pteiñ yei e yarap ya kani ka skurbah.
Neiliang u Pastor R. Arche, Balang Seventh Day Adventist da e mynsien u wow bet ya ki symbe wow yatylli, u ya sñiawthooh hapyrdi ki jaitbru waphær waphær yow im dei suk ha kani ka pyrthai wa katni wa joor ki ya kynaad.
Kam chibynta kani ka lehkmen yow e mynsien ya kiwa lai puræ kamjooh kiwa sikai kiwa wan na kyllieñ ki jylla ka North East, da pynyoo rong ya kiwa boon ki jait chaad tynre, ki baam, ki jait yalehke, ki rwai wa kiwi kiwi yow pynman ya kani ka sngi kawa sahkynmoo wei wow pynman leh ya kani ka thaw puræ kam ka nongmuna wa ye u imlang deiwa em i suk i saaiñ.
Discussion about this post