Ka NSS Unit-Shangpung College chirup deiwa ya krehlang waka yung krehkaam u Range Forest Officer, Social Forestry, Range Shangpung, West Jaiñtia Hills District da lehkmen ki ya ka World Environment Day ynnin ka 5 tarik.
Ha kani ka sngi da pynman ki yakob Quiz Competition, Slogan Writing wei da em leh ka ya thung dieñ kamjooh ka pynsñiawthooh paidbah hajrong ka phang Mission LiFE (Beat Plastic Pollution).
Ha kani ka yalang da emlang leh wa ki khynnah puræ yong ka College, ki waheh chnong yong ka Shangpung Pyllun, u Secretary Ka Synjuk Ki Dorbar Chnong, Shangpung, u L.D. Suiam, u M.C. Suchiang, u Forester-1 yong ka Range Forest Officer, Social Forestry, Range Shangpung wa u Pa Dolloi yong ka Elaka Shangpung, u C. Langbang.
Neiliang u Nismeories Pariat (Retd. Lecturer DIET, Nongstoin) da man u kam u Resource Person ha kani ka sngi heiwa da pynsñiaw u chaphang i sih hawa pynemkaam ya ka Plastic khamtam hawa thang ya ki iwa ktah yei khooid ka la-ær kawa riñ mynsien i.
Chooh chooh da ong u wa emkaam yei roi i paar ha waroh ki liang khlem da mylliñ wow pynneh wow sumaar ya ka soodong sookun ka yong i. Da e nongmuna yei ku i chit wei duna slap katwa dang lai ki por iwa ktah joor yeiwa im i man-ka-sngi. Kamtæ da kyntu u ya waroh wow thung dieñ wei wow sumaar ya ka bei rym-aw wymtoh du ha ka 5 tarik u Naiynru tangwa ha waroh chi snem kamjooh katwa dang im.
Da pynkut ya kani ka lehkmen deiwa chimbynta hei wow chim smai hapoh i yahkhmat u Programme Officer yong ka NSS Unit, u Emmitre Iakai.
