Ka Parish Mookyndeng, West Jaiñtia Hills District ynne ka sngi da lehkmen ko yei dap 100 snem i wan ki Salesian Missionary cha Ri-loom Jaiñtia neibynta wow chakri yaka imlang sahlang la hawa yatoh wa ka sikai im wa kynja mynsien, i puræ puthi wa kiwi heiwa da wan chimbynta lang da ki hajar ki paaid wa ngait ka Balang Catholic.
Kam i dak wow sah kynmoo ya kani ka sngi, da wai leh ya u mot sahnaam yong u Don Bosco da u Fr. Paul O Lyngkot, SDB Provincial wa da chna ha pchem ka Parish Mookyndeng wei da e u leh yei kyrkhu pynkyntang.
Da pynlait paidbah leh yaka kot wa da thoh da u Fr. Festus E Shadap SDB, kawa batai chapang i kreh ki phadar nachwa ha kani ka thaaiñ kamjooh ki kaam yong ka balang wa da lai haki snem wa da dep.
U kongsan yong kane ka sngi, u Fr. Paul O Lyngkot hawa e yei klam haka Mass Wa Khooid da ong u wa da toh i por ya i wow ngooh wow dem ynne ka sngi yow pynyoo yei burom kammon ki Missionary ha u snem 1890 da wan ki cha ka ri yong i.
Da ong u leh kamwa wa u Ioanis da yieñ sakhi u, u Paulus da yieñ u wow sakhi wa ki Missionary haki 100 snem wa da dep leh ki yieñ sakhi ki ya u Chris, i kiwa im katni leh kwah i wow pynsakhi pynthymme ha itæ i rukom wa kammon wow im wow lai u yieñ sakhi yei che ha u Chris khlem tieñ ya iyi wa da jia wei daw jia.
Wei hawa khut yaki paaid wa ngait, ong u ini toh i por wa hap pynthymme yei im, i ngait wa i chaniah ha u tre wa thaw.
Hawa yaklam wa u Fr. Henry Warbah, SDB Rector Parish Priest ka Mookyndeng, da khana u wa ha i lai luti wa 100 snem, ki Missionary da hap maad ki yei eh, i yaleh wa boon rukom, ki Missionary wa wan nadooh ri pharæng da yaleh ki katwa ye i bor i buit wei da lai ki lyngba ki rai wa eh wa boon heiwa da em leh napyrdi yong ki kiwa da chah pynyap ha kiwa choon.
Kayi wa da leh haki 100 snem toh wa ha ka Balang Catholic da yarap ko ha kiwa boon bah ki liang deiwa sdang wow pait wei pynlai ya ki skur wei da e leh ha ki khynnah yei sikai waphær waphær kammon wow manbru hawa im ki, wei ki Salesian Missionary da pyrchang ki katwa ye wow yarap leh haka imlang sahlang hawa yatoh wa ka suk ka saaiñ wa bha, i miat hawa yatoh i rukom pyrkhat, ka yatylli deiwa lai na kawi ka chnong cha kawi won lyngba ki yaseiñ waphær waphær wow khriñ yaki bru wow wan cha ka hima i suk, ka hima maya u Blai.
Kamtæ ha kini ki 100 snem da em boon bah ki bru wa da wan deiwa sñiawthooh wa ka mon yong ki hi cha ka Balang Catholic.
Da pynphooh pynphieñ ya kani ka sngi da ki pynyoo rong ya ka dustur riti, i e ya ki tiar sah kynmoo namo ki Mementoes ya ki bru wa khroo nadooh ki Phadar, ki Sister kam ka dak wow sah kynmoo ya kani ka sngi wa khroo.
