Ka Rashtriya Bal Swasthya Karyakram (RBSK), Meghalaya ha ka 12 tarik uni u bnai da lehkmen ko yei dap 10 snem i jop yong ka hei lai luti neibynta u chakri yei chait i khiah ki khynnah wa hapoh 18 snem i rta ha ka yalang wa da pynman ha GHM Guest House Jowai.
Da emlang ha kani ka yalang wa u F. Passah, Assistant Commissioner, Jowai kam u kongsan, neitæ ka Dr. P. Shylla, District Medical & Health Officer, Jowai, ka Dr. Helen Uriah, DMCHO, ka Dr. AE Paswet, Pediatrician, Dr. J. Lakiang, MO DEIC, ki Doctor wa ki dkhot ka kynhun Mobile Health Team (MHT) kamjooh ki bru ka District Early Intervention Centre (DEIC) yong ki le tylli ki District ka jylla wa kynthup ka West Jaiñtia Hills, East Jaiñtia Hills wa ka Ri-Bhoi District.
Ha kani ka sngi da tipmit wei burom leh ya ki bru yong ka chnat i chait i khiah kiwa da kreh kyllooid mynsien nadooh kiwa kreh ha ki Mobile Health Team wa kiwi won ki kynhun na Ri-loom Jaiñtia Hills wa Ri-Bhoi District wa da chimkhia ki u pynyoh ki laad sumaar heipor wa biang ya ki khynnah wa hapoh 18 snem i rta.
U F. Passah, Assistant Commissioner hawa klam kam u kongsan da e yaroh u ya kani ka kynhun hajrong ki kaam wa da leh ko, wei wot hapyrdi boon i eh i khoo neipor cheipor da yaleh chitom ki wow chem yei kjut chitom ki khynnah wei wow pynbiang leh yeiwa emkaam yong ki neibynta i bha i miat yong ki.
Ka Dr. I. Gatphoh, State Nodal Officer, RBSK da pynsñiaw ko i sarong ya ka luti wa da lai ka RBSK ha ki 10 snem iwa da sdang nadooh u snem 2013 deiwa yoo jngai ka sorkar bei. Pynsñiaw ko leh i hun hajrong i jop kani ka RBSK neibynta u pynyoh ki laad sumaar ya ki khynnah.
Da e yaroh ko leh nadooh ya ki Mobile Health Teams yong ki Doctor, ki Nurse, ki Pharmacist kamjooh ki ASHA, deiwa yooluti wa lyngba i chimkhia ka RBSK daw ye leh u pyntikna i chait i khiah neibynta ka mynried yong ki khynnah ha kylleiñ soodong ka Meghalaya.
Ka Dr. Gatphoh khana haroh ko wa kani ka RBSK pynkhlan chooh chooh ko ya ki laad e sumaar deiwa li thooh bniah yei chait i khiah ki khynnah ha ki skur, ha ki Anganwadi Centre wa ha ki thaw sumaar waphær waphær.
Neiliang ka Dr. H.L Suting, DEIC Manager, Jowai kawa pynlai ya ka yalang da pynsñiaw haroh ko hajrong i emkaam u pynkhlan chooh chooh ki laad e yarap neibynta ki khynnah wa chah ktah nadooh i por wa kha, wei wow ye ki u heh u kmai hei bor yong i doh i pran, i bor pyrkhat kamwa man kiwi ki para khynnah.
Da pynkut ya ka yalang da ki kyntien e khublei na u Johnson J Nongbet, Consultant RBSK-NHM.
Discussion about this post