Ka Women’s Wing Dulong namo ka seiñ kynthai yong ka Dorbar Chnong Dulong Jowai, ynnin i janmiet ka 8 tarik da lehkmen ko yaka International Women’s Day kawa man ka sngi wa kyrpang ki kynthai hajrong ka phang “Gender equality today for a sustainable tomorrow” haka yalang wada pynman ha Community Hall ka chnong.
Hawa e yei klam pdiang, ka Anumaheisa Lytan, Chairperson ka seiñ kynthai ong ko wa ya kani ka sngi wa kyrpang ki kynthai da lehkmen hei rukom waphær waphær hajrong i embynta yong ki haka imlang sahlang nadooh i stat i tip, i synchaar khadar wa kiwi wei katni da tia bha ki chakhmat ha kiwon kiwon ki kaam.
Ka Beaulet Passah, Guest Speaker hawa e yei klam ong ko wymtoh de u em i pynyaphær hapyrdi ki kynthai wa chynrang, neibhah waki kynthai leh em ki ka bynta wa khroo wei haka juk stat wa katni wym em de ki kaam wym ye ki kynthai u leh.
Neiliang u waheh chnong ka Dulong, u Sienwanmi Bareh kam u kongsan yong kani ka sngi sñiawkmen u wow yoh embynta lang ha kani ka sngi wa khroo ki kynthai kiwa da embynta u e chiboon cha ka imlang sahlang.
Da pynrap haroh u wa sakhiat hi ki kynthai man ki kiwa yarap bha hapoh ka chnong ka thaw, waka imlang sahlang hi waroh kawi, kamtæ yooluti u wa lyngba kani ka yalang haki snem wow wan u nang yoh chooh chooh i yakrehlang naki kynthai naddooh ki khynnah, ki khynroo wa waheh.
Ha kani ka sngi da yoh leh i ngooh Blai naka Amalia Lakiang, Secretary ka Women’s Wing Dulong katwa ki kyntien e khublei naka Jeminia Chyrmang, Vice Chairperson WWD.
