Jowai: Ar snem nachwa ynne ka sngi ka 24 Kmaichonglad 2016 da sdang ya ka Seiñ Raij Raliang wei ynne ka sngi da pynman ya ka lehkmen lyngkhooh snem yong ka ha Madan Chrah-Umphula Raliang heiwa da tip leh ya kani ka sngi kam ka Foundation Day.
Kani ka lehkmen da sdang ko nadooh ynnin ka sngi heiwa da pyndep ya ka lehniam kñia wa tip kam ka Kñia Blai Chrah Umphula wei hei miet da pynman ya ki yakop kam ka Khohpoit Niam, u klam khlem pynkhreh hajrong ki phang wa daw e (extempore speech), wa ka yañia (Debate) wa ka Quiz hajrong ka niam ka rukom.
Ynne ka sngi da pynman ya kani ka lehwarom kawa man leh kam ka sngi wow yachemlang ki khon ka Raij Raliang wei wow pynku ya ka Niam hapoh ka Raij.
Ki khon ka Raij da wan chongchit wei ka-it mynsien ki cha kani ka lehwarom heiwa da em ka yalang ya kawa da pyllai da u Hamjhan Dkhar uwa man leh kam u Adviser ka seiñ.
Da yoh i klam na u Acting Dolloi ka Elaka u Bnai Dkhar, u President ka Seiñ u Pynroi Dkhar, u Waheh Chnong ka Raliang u S. Sanki Lamare, wa kiwi kiwi.
Ha kani ka sngi da wan sakhi ya kani ka lehkmen da u MLA ka thaiñ u Coming One Ymbon uwa hei klam da e yaroh u ya ka seiñ wa da ye ko u pynman ya kam kani ka yachemlang deiwa kyntu ya waroh u man ki kiwa im hok wei kiwa minot la hei puræ puthi wa hei khih i khan.
Da kyntu u leh ya kiwa em ha kani ka sngi wow man ki kiwa kitkhia wow pynman ya ka Raliang kawa khooid wa jngiar neibhah lyngba i khooid i jngiar yoh leh yei doh i pran wa chait wa khiah.
Hadien ini da saam ya ki khusnam cha kiwa jop ha ki yakop wapær waphær wa da pynman ynnin ka sngi.
Da pynkut ya kani ka yalang da ki kyntien khublei na u Emsakhiat Lyngdoh uwa man leh kam u Executive Member ka Seiñ Raij Raliang.
Chooh chooh da pynphooh ya kani ka sngi da ki chaad wa ha rukom wa da pynkhreh da ki khon ki Seiñ Raij ka thaiñ kam na Nangkynrih, Mukhap, Laskeiñ, Khonchnong wa kiwi kiwi kamjooh leh na ki ynñiaw dong ka chnong Raliang.
Discussion about this post