Ka skur Seiñraij Higher Secondary School Jowai kawa da seiñ nadooh u snem 1964, ha ka 9 tarik uni u bnai da sdang ko u lehkmen yei dap 60 snem i lai luti wow e i tip i stat cha ka imlang sahlang.
Ya ka yalang lehkmen da pynman ha pchem kani hi ka skur heiwa ka A.P. Syiem, District School Education Officer, West Jaiñtia da man ko kam ka kongsan, ka M. Lakiang, District Mission Co-Ordinator, West Jaiñtia Hills kam ka symbood kongsan, hei emlang u Raymond Nartiang, Pator Elaka Jowai, kiwa sikai, ki khynnah skur wa kiwa chah khut sñiawbha.
Ka kongsan hawa e yei klam yooluti ko kamwa da kaap cha u moomær wa chadien, ngait skem ko wa u moomær wa chakhmat wow man uwa rap tyrchaaiñ chooh chooh, wei du i yakrehlang donhi yow ye u poi cha ka thong wa kynthup nadooh ki dkhot SMC, kiwa sikai, ki khynnah skur wa waroh kiwa embynta ha kani ka skur.
Kyntu ko leh ya ki khynnah skur wym toh u pynsepai yei sap wa da e u Blai tangwa toh u mih pynyoo pyrthai chakhmat khang yow man iwa pynmyntoi hadien habood neibynta u man uyi ræ kayi ha ka mynried mankawi.
Ya kiwa sikai kyntu ko wow sikai ki da iwa bha tam ya ki khynnah skur hanla em hapyrdi i eh khoo, neibhah ka mynried yong ki khynnah chong hei kti kiwa sikai kammon u pynwandur ya ki kat dang em ki hei thaw puræ.
Pynrap haroh ko deiwa ong, ka Jubilee man ka por wow lehkmen u kynmoo yeiwa dadep, wei toh leh i por u em i yoo jngai ka thong wa chakhmat, wei deiwa yoo jngai ngait skem leh yei stat i tip i puræ puthi wa biang tam.
Chwa ini da yoh i klam na ka Wowpher Laloo, Principal ka Seiñraij Higher Secondary School Jowai kawa da khana yei lai luti ka skur hadooh wa man ko kamwa man katni, neitæ i klam na u C.A. Ram Kyndiah, Secretary SMC, i klam na u Mariyoo Rymbai, Headmaster UP School uwa man leh u Secretary yong ka Diamond Jubilee wa kiwi.
Da pynchongchit ya kani ka sngi da i chaad i rwai.
Discussion about this post