Ka St. Michael & All Angles Secondary School Jowai, ynne ka sngi da sdang ko yei lehkmen dap 25 snem i lai luti yong ka heiyatoh wow saam i stat i tip, deiwa pynman ya i lehkmen wa boonjait wa da chimbynta da ki khynnah skur nadooh i rwai i chaad wa kiwi.
Ha kani ka sngi sdang lehkmen da wan sakhilang ka C. Lyngdoh, Block Mission Co-ordinator wa man leh ka Sub-Inspector of School, West Jaiñtia Hills kam ka kongsan, neitæ u Rev. K. Dkhar, Chairman ka SMC kani ka skur, kiwa sikai, ki bei ki pa yong ki khynnah skur wa kiwi ha ka yalang wa pynlai da ka A. Sumer, Asst. Headmaster.
U M. Gatphoh, Headmaster hawa khana ya ka parom tbian ka skur ong haroh u wa kani ka sngi man leh chibynta i burom ya kiwa seiñ wa sdang ya ka wa lyngba i yahluti yong ki jop i e chakri kani ka skur. Wei neini chakhmat u pteiñ chooh ki yei lai luti hanla hap maad ya i eh i khor, u pdiang leh yei stat i tip katkam wa yah ka juk, wei u yaleh wow pynneh pynsah ya ka riti dustur najrong wow em i bahkhlieh ya ka imlang sahlang.
Neiliang ka C. Lyngdoh kam ka kongsan, hawa yaroh yei lai luti kani ka skur ong ko, ka skur toh ka yung wow yoh yei stat i tip, wei boon kiwa embynta lang ha ka wa kynthup nadooh ki Headteacher, ki bei ki pa, ki khynnah skur, kiwa sikai, ki dkhot ka School Managing Committee wa kiwi kiwa em jar jiar i bynta krehkaam.
Ha kani ka sngi da ban joor ko heiyatoh i kaamram yong ki School Managing Committee neibhah wa man ki kam u budloom yong kawon kawon ka skur, deiwa ong lada tlot ka SMC, ka skur leh man kawa sahdien ha waroh ki liang, tangwa la khlan won ka SMC da yoh ya ka skur kawa tyrchaaiñ wa lai chakhmat ha ki bynta waphær waphær.
Neitæ kam ka Inspector of School boonsieñ hi chem ko i daw wa tlot ki skur la heiyatoh i wym biang i chna ya ki skur, næ i duna khynnah toh wym em hi chimkhia ki dkhot SMC.
Yow man ka skur wa lai chakhmat, emkaam ya ki dkhot SMC u man kiwa e i kyrchaan, u pait bniah yei man i long ka skur wei wow e leh i ya krehlang.
Discussion about this post