Ka Ummulong Presbyterian College, West Jaiñtia Hills District kawa da seiñ haka 01-07-2013, ynne ka sngi kawa man ka lyngkhooh sngi wa seiñ kamjooh leh i dap 10 snem i lai luti yow e i chakri heiyatoh wa i puræ puthi, kamtæ neiliang ki bor pait bor pynlai yong ka deilang kiwa sikai da pynman ki yei kynmoo burom kyrpang ya kani ka sngi haka yalang wa da pynman ha Youth Centre ka Balang Presbyterian Ummulong.
Katkam ka parom tbian da ong wa ya kani ka College da seiñ da ki 13 ngut ki waheh wa siañ deiwa kyrchaan ka Ummulong Presbyterian Church kam ka Sponsoring Body, wei heipor wa sdang em kamwa 51 ngut kiwa lai puræ.
Kamtæ kat nang lai ki por ki snem da nang ku nang ku ko wei hadooh kamwa man katni dang yakrehlang ko waka Thomas Jones Synod College heiyatoh ki Exam waphær wa yaleh da kiwa lai puræ.
Ha kani ka sngi kynmoo burom, u CEM ka JHADC, u Thombor Shiwat da man u kam u kongsan, u Jessie Suiam, EM JHADC kam u symbood kongsan hei emlang kiwa sikai, ki dkhot ka Sponsoring Body, ki khynroo khyllood wa lai puræ wa kiwi de.
U Jessie Suiam hawa klam da e u i sñiawngooh wa khroo ya kani ka sngi wa man ka sngi wow sah kynmoo pateiñ neibhah wymtoh iwa suk u lai luti haki snem chadien khamtam heiyatoh u pynmih yaka yarong poisa.
Kamwa ha pyrthai im i hapyrdi ka madan thma wa hap yabeh thong, kamtæ kyntu u yaki khynroo khyllood wa lai puræ u man ki kiwa kreh chitom yow poi cha ka thong wa mang.
Da ong haroh u wa ka yung ka sem toh ka tynre wow pynwandur nyngkong yei manbru katwa manda poi haki College won da hap u kitkhlieh pyn ya idæ, kamtæ kam kiwa puræ emkaam bha u sñiawthooh jar jiar ka luti khamtam u jied yaka mynried.
Neiliang u Thombor Shiwat won da ong u ki 10 tylli ki snem la hei manbru dang man iwa jinjar bha u sneiñ u hikai heiyatoh waka mynried yong ki khon, tangwa i yoh ya kani ka sngi wa khroo won kamjooh i yoh kiwa boon yei stat i tip lyngba kani ka College kiwa da man kamwa man ki katni toh lyngba i raikut ki waheh wasian wa yoo jngai yei emkaam kani ka College neibynta ki khynroo khyllood na kylleiñ ki thaw.
Tæ kamwa neiliang kiwa pynlai kani ka College da pynsñiaw haroh ki yei emkaam wa dang dawa u kyntu kynrong la heiyatoh ka yung ka College wa kiwi ki rukom, u CEM da kular u wow yarap T. 5 lak cha kani ka College lyngba ka Central Scheme yong ka 15th Finance Commission.
Da khana haroh u wa ka JHADC katni maad ko hei kyrdooh poisa wot tang u su yaka tulop ki wakreh leh dang sahteiñ u su, i daw toh wym pu yoh yaka bhah poisa wa khrong dan da ka sorkar jylla wa yatoh na ki mar pohkhyndaw.
Da pyn-ehbok eh-nasib u leh khamtam ya kiwa yahkhmat ka College nadooh ka Balang Presbyterian Ummulong kamjooh ka chnong ka thaw kawa da yakrehlang yow nang ku kani ka College neipor cheipor.
Chwa ini da yoh leh i klam na u TBn. B. Pohshna neiliang ka Sponsoring Body, naka Principal Ummulong Presbyterian Higher Secondary School, ka M. Shangpung, na u waheh chnong Ummulong, u L. Laloo wa na u Principal ka Ummulong Presbyterian College, u Dr. A.J. Lymba.
