Ki bor District ka West Jaiñtia Hills deilang waka jylla Meghalaya waroh kawi da pynman ki yei lehkmen dap 51 snem ka jylla Meghalaya ha ka yalang wa pynman ha Conference Room, u DC ha Jowai ynne ha ka yalang wa pynman da ka yung krehkaam u DC hi.
Da ya emlang ha kani ka sngi wa u B.S. Sohliya, IAS, Deputy Commissioner, u Superintendent of Police Bikram D Marak, MPS, u F.B. Basan, u M.A. Challam, ka H.M.L. Kynta, u D.V. Lyndoh kam ki Additional Deputy Commissioner, u WK Kharbuli, Extra Assistant Commissioner wa ki heh ki chnat sorkar hapoh ka District deilang kiwa yahkhmat niam, ki NGO wa kiwi kiwi de.
Hawa e khublei ha kani ka sngi, neiliang u DC da khut u wow pteiñ chooh chooh yei ya krehlang na waroh ki chnat sorkar ka District khamtam ha kani ka Election wa daw man ha u bnai wow wan. Da kyrpaad u leh ya waroh ki heh wow leh ki yei kaamram yong ki wei wow kreh dei mynsien wa chongchit wa ki bor District.
Neiliang ka HML Kynta hawa e yei klam wai phang da khana ko yei lai luti wow yoh ya ka jylla Meghalaya wei da lehkmen ynne ka sngi yow sahkynmoo ya kani ka sngi kamjooh ya waroh kiwa da yaleh wei yakhih yow pynyoh jylla.
Da ong ko leh wa kani ka sngi toh wow kynmoo yei waroh iwa da leh da ki bru saiñhima, kiwa sikai, ki warep, kiwa chna sur, kiwa chna dur, ki wakreh sorkar wa uwi pa uwi wa chong chnong wa da leh yei jar jiar i bynta yow pynman ya ka jylla yong i kam kawa miat dur wa kiwa maya yei suk hapoh ka ri.
Chooh chooh da ong ko wa ynne ka sngi toh yow pynkynmoo ya uwi pa uwi na i yeiwa da yaleh chitom ki longchwa manchwa wei katni da man ko i kitkhlieh yong uwi pa uwi yow pynman ya ka jylla kam kawi na kawa bha dooh hapoh ka ri deiwa kreh hok kreh chitom i iwon iwon iwa leh i.
