Jowai: Ka skur St. Paul English Secondary School, Mookaswan chirup wa ki khynnah puræ yong ka da leh burom ki ya ki bei ki pa yong ki ha kani ka 26 tarik ha ka programme yong ka skur wa tip kamka 7th Parent’s Day Celebration.
Katkam ka programme yong kani ka sngi wei neiliang yong ka skur da khut ko ya u Sniawbhalang Dhar wow wan sakhi ya kani ka programme kam u Kongsan, tangwa na ki daw wym ye u kiar da phah da uwa mihkhmat yong o u J.E Siangshai wow man kam u kongsan ha katai ka sngi.
Ha kani ka sngi da wan ya sakhi lang ya kani ka programme da ki bei ki pa yong ki khynnah skur ki wa puræ hei ya emlang u Waheh Chnong ka Mookaswan u B. Shylla, wa kiwi kiwi.
Ha kani ka sngi da bhah ya ka programme ha ki ar bynta, heiwa heipor step da pyndep ya ka yalang tbian hei wa da pyllai ya ka da u S.K Lato uwa man kam u Secretary ka School Managing Committee pynbood dei ngoohblai wei puræ ya ka Bible na kiwa sikai ka M. Lathong wa na ka H. Pasleiñ. Katwa ya ki kyntein pdiang burom da pachat da u Headmaster ka skur u M. Gatphoh.
Ha chwa wow yoh yei klam na u Kongsan yong kani ka sngi, da pachat chwa ya ki kyntien yaroh ya kani ka skur na u Waheh Chnong ka Mookaswan u B. Shylla, pynbood won ki kyntein chaphang kani ka skur, wa yimut kani ka 7th Parent’s Day Celebration da ka Director kani ka skur ka E.F Gatphoh.
Katwa neiliang yong ki bei ki pa kiwa phah puræ ya ki khon yong ki ha kani ka skur da pachat da u L. Suchiang, heiwa da khana u wa da phah puræ ya ka khon yong oo hei rta wa dang 3 snem tam heiwa ki ympoi pyrkhat ki wa ka khon yong ki u smat ko u tip u puræ wei thoh ya ki dak heh dak khian, kamtæ chem ki wa nadooh kiwa pyllai skur ki ka ha kani ka skur da boon i wa tip ko, ka wa mut kani pynyoo ko ka dak wa kreh chitom kiwa sikai ya ki khynnah skur.
Neiliang yong u J.E Siangshai uwa da wan kam u kongsan da ong wa oo sñiawsuk bha u wow embynta ha kam kini ki programme neibynta ki khynnah, neidaw wa oo leh em u ki khon wa puræ cha palat chnong hei wa na ki por cha ki por haap lai u cha ki skur yong ki wow e mynsien ya ki khon ha ki programme yong ki kam ka dak wow pynchlur ya ki hei wow ye ki u lai chaphrang.
Da pynphooh pynphieñ ya kani ka sngi da i rwai na ki khynnah skur wei ka bynta wa ar yong kani ka programme toh ka Entertainment Programme heiwa da leh burom ya ki bei ki pa yong ki da ki rwai ki chaad, ki fancy dress na ki class waphær waphær.
Discussion about this post