Kam chibynta wow lehkmen ya ka sngikha yong kawa da pynthymme yei rukom kreh ki Nurse, ka Florence Nightingale, neiliang ka Trained Nurses Association of India, West Jaiñtia Hills Unit, ynne ka sngi ha Mynso-A Community Hall da lehkmen ki ya ka International Nurses Day namo ka sngi kyrpang ki Nurse hapoh pyrthai hajrong ka phang: “Nurses: A Voice to lead-Invest in Nursing and respect rights to secure global health.” Kani da man ko leh kam wow wai ya ka lehkmen Nurses Week.
U Dr. B. Langbang, Block Development Officer, Laskein C&RD Block da wan u wow embynta kam u kongsan heiwa ka Dr. D. Nongpluh, Superintendent ka Dr. Norman Tunnel Hospital, Jowai da man ko kam ka symbood kongsan.
Ka lehkmen da sdang ko deiwa thang ya ka charak da u kongsan iwa da pynbood da i sur Nurses Anthem wa yahkhmat da ka B. Tang, Principal Dr. Norman Tunnel Hospital School of Nursing, Jowai.
Hawa e yei klam, u Dr. B. Langbang da pynsñiaw u yei sñiawngooh wei da yaroh u ya ki Nurse yei kreh chitom ki khlem da pyrkhat de ya idæ neibynta kiwa kjut wa chitom. Da pynsñiaw u leh yei sñiawngooh ya ki Nurse kiwa da jied wow kreh ha ini i kaam wa eh.
Da ong chooh chooh u, “Katkam wa da chem O, khamtam ha ki por ka khlam COVID-19, ki Nurse toh kiwa da yajan bha wa kiwa chitom, ki da sumaar ki ya ki dei mynsien wa maya khlem da pyrkhat de yei yong ki.” Da pynchlur u ya ki wow pteiñ ki yei kaam wa bha yong ki dei em i khmat wa tyrchaaiñ. Da kitbok kitrwiang u leh ya ki neibynta ka mynried yong ki.
Hawa yaroh ya ki Nurse ya i chakri yong ki ya kiwa kjut wa chitom, ka Dr. D. Nongpluh da pynkynmoo ko wa katni im i ha i por wa boon ki stat ka juk wa katni tangwa ym toh u mylliñ i ya u Blai uwa da e ya i ya waroh yow ye u leh yei kaam yong i, kamtæ toh u kynmoo wow man kiwa jemnood wa kiwa em yei mynsien maya kamjooh heipor wa pait ya kiwa kjut wa chitom.
Da chim ko leh ya ki kyntien naka Bible lyngba ka Proverb 16: 24 wa ong “Ki ktein wa sbun man ki kam i um-ngap, iwa thiang neibynta i mynsien wa i chait i khiah i doh i pran” da pynkynmoo ko leh wow man kiwa bha mynsien, kiwa jai jai ha ki ktien yong ki wei wow pteiñ yei yahkhmat hei kaam neibynta i chait i khiah.
Ka Sashika Lato, Staff Nurse Iooksi PHC ha ki ktien wai phang da klam ko hajrong ka phang yong kani ka lehkmen ha uni u snem.
Ka Trained Association da e ko leh ya ki tiar sahnaam namo ki Mementos cha kiwa da chong ngiah kam ki Nurse ya ki kaam wa da leh ki.
Hachwa ini, da yoh ya ki ktien pdiang sñiawbha na ka Barbara Rymbai, Staff Nurse DM&HO, Jowai. Ya ka yalang da pynlai da ka Suzy Lewis Chen, Vice Principal Dr. Norman Tunnel Hospital School of Nursing, Jowai katwa ka Nellie Bonnei Pariat, Staff Nurse Dr. Norman Tunnel Hospital, Jowai da e ko ya ki ktien e khublei.
