Lehkmen pynemwarom ka Nongjngi Schools and Teachers Union yaka World Environment Day  

Ha ka sien kawa nyngkong, itæ ha ka 4 tarik uni u bnai, ka Nongjngi Schools and Teachers Union da lehkmen pynemwarom ki ya ka bei rymaw deiwa chimbynta da ki 16 tylli ki skur nadooh ki Lower Primary, Upper Primary wa ki Secondary School kamjooh leh ki Waheh Chnong waphær waphær kiwa da ya embynta lang ha kani ka sngi.

Ha kani ka sngi da pynman leh yei thung dieñ ha jiar jiar ki skur. Hadien wa dadep thung ya ki dieñ, da pynman leh ya yalang paidbah deiwa mih na ki skur dep tæ lai yachemlang ha ka Madan Raij yong ka Riaj Nongjngi, Madan Thad-Mukui.

Ha kani ka madan da pynman ya ka yalang kawa tbian kawa da pynlai da u President ka seiñ, u Genesis E Kam, heiwa da yoh leh yei klam wa tbian na ki waheh chnong waphær waphær yong ka chnong Nongjngi waroh kawi.

U kongsan yong kani ka sngi toh u MDC ka Nongjngi Constituency, u E. Teron uwa da ong wa dap u dei kmen dei sñiaw sarong wa da yoh u ya chimbynta lang kam ha kani ka yalang wei wa da man ko leh kawa nyngkong ha ka chnong Nongjngi. Sei wi leh da ong u wa ka laad wow pynneh pynsah yei miat yei bha yong ka bei rymaw toh deiwa sikai ya ki khynnah nadooh dang khian hadooh wada heh, khnang yow tip hi ki u ri u sumaar, u pynkhooid u pynjngiar ya ka bei rymaw kawa psa kawa pyntun ya i waroh chisnem chisnem.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da yoh leh i klam i sneiñ na kiwa boon ki waheh chnong deiwa mynjur wym hoi de u noh taroi yei jhep i jhoor kat chawa yoh wa lap hi-eh, khamtam ya ka Plastic kawa sih bha, kawa ye u pynsih dur lane u pyntaroi ya ka bei rymaw.

Da yoh leh yei ya thung dieñ ha ka Madan Thad-Mukui kawa da ya chimbynta lang chirup chirup wa u MDC, ki Waheh Chnong wa ki Head Teachers.

Hadien ini da yoh ya ka pynsñiawthooh paidbah heiwa da khana da sneiñ, da pynap pynsñiaw da u Sophilos Lywait, Asst. Teacher Moolephaw Government L.P. School uwa man kam u Resource Person uwa da batai da pynsñiawtooh bniah bha ya ki khynnah skur kamjooh leh ya waroh kiwa emlang ha katai ka yalang, khnang yow man kiwa sñiawthooh hadooh katwon kordor ka bei rymaw. Yow tip hi ki leh u man kiwa husiar neini chakhmat heiyatoh wei pynsih, pyntngit, pynjæd, pynra ya ka bei rymaw.