Kam chibynta i lehkmen yaka Republic Day wa 73 ka ri, wa i lehkmen yei dap 50 snem ka jylla, ka Seiñ Manbei chirup waka Sport & Cultural Club yong ka Dongneiñ Sohmynting West Jaiñtia Hills District ynnin ka sngi da chimbynta ki hei lehkmen ha madan Ktiehheh Dongneiñ, wei yaka lama yong ka ri da pynhær daka khynroo Planky Pyrtuh kawa man kam ka kongsan yong kani ka sngi deilang i rwai yei sur National Anthem.
Haka yalang wa pynlai daka Dr. Arkidon Pyrtuh, Chairperson ka Seiñ Manbei da yoh ki kyntien pdiang na u Wailad Suting, Vice President ka Dorbar Dongneiñ Sohmynting, da yoh ki kyntien sneiñ na u Simon Pyrtuh, na u Dapoi Pyrtuh waheh chnong warim, u Bravestar Phawa wa kiwi.
Ka Planky Pyrtuh hawa e yei klam kam ka kongsan da kdaw ko yaki kattu katni ki bru khroo wa da embynta u pynyoh laitlooid yaka ri wa kynthup leh kiwa napoh ka jylla Meghalaya.
Neitæ najrong wa e yaroh ko yaka thong yong ka Seiñ Manbei da kyntu ko leh ya kiwa kitkaam kamjooh kiwa chong chnong wow man kiwa yatylli hapoh ka dong ka chnong neibynta i bha i miat.
Heijooh i por da ong ko wa ka khynthai wa stat tei ko ya ka yung ka sem ka imlang sahlang, katwa ka khynthai kawa biej pna ka hi wa chna kulmar.
Da pynchongchit chooh chooh ya kani ka sngi dei Chaad Pliang na ki Seiñ Manbei, i rwai naka kynhun SHG Sohmynting, i ya chimbynta lang wow rwai yei sur “Ri Khasi Ri Jaintia”, katwa yei kyntien e khublei da yoh naka Riwull Kyndait.
U General Secretary ka Dongneiñ Sport & Cultural Club u Jerry Anderson Suting, da pyntip u wa hei janmiet yong kani ka sngi da em leh i yalehke waphær waphær wa kynthup nadooh i lehke Sports, i rwai, i chaad, ka Traditional Show wa ka Fashion Show.
