Ka Jaintia Network Society (JNS) chirup wa ka Nehru Yuva Kendra Sangathan Jowai da yoh ki wow lehkmen pynemwarom ya ka sngikha yong u Pandit Deendayal Upadhyay kawa man ha ka 23 tarik uni u bnai ha ka skur Demthring Presbyterian Secondary School. Ka sngikha yong uni u bru wa khroo toh ha ka 25 tarik tangwa neidaw wa haap ko ha ka sngi Bibar kamtæ da leh warom ya kani ka sngi ha ka 23 tarik.
Ya kani ka yalang da pynlai da ka P. Lamare, kawa man ka President yong ka Jaintia Network Society wei da yoh yei klam pdiang sñiawbha na u Headmaster kani ka skur, u K. Ryngkhlem uwa da e khublei ya ka Jaintia Network Society wa da pynman ki ya kani ka yalang ha ka skur. Da ong u wa ym jooh em sñiaw u chaphang uni u bru wa khroo yong ka ri iong i, wei da ong u man ka skur kawa embhah wow yoh kam kani ka laad wow pynemwarom ya kani ka sngikha u Pandit Deendayal Upadhyay.
Da yoh leh yei batai chaphang i lai luti yong ka Jaintia Network Society hawa ya kani ka Society da sdang da ki 5 ngut ki chi lok ha u snem 2019 wei da tipmit (Register) ya kani ka Society hapoh ka Meghalaya Society Registration Act XII 1983. Ki kyntien im sngi namo ka Motto yong kani ka Society toh “Inform, Educate & Empower.”
Ka P. Lamare da khana ko wa nadooh wa sdang ki yalang wa da jooh leh ki ha ka chnong Mupliang kam ki Advance Christmas, ki kynja e sikai waphær waphær wa da e ki cha ki warep heiyatoh wa i rep i riang, em kawi ka Project kawa yoh kani ka Society na ka IDeA- The Ant, Guwahati Assam kawa daw pynkrehkaam ha ka chnong Mupliang. Kamjooh da pynkreh leh ya kiwa boon ki yong ka Nehru Yuva Kendra Sangathan Jowai wow kynmoo warom ya ki sngi wa kyrpang. Hadien ini da khana leh chaphang ka Nehru Yuva Kendra Sangathan Jowai wa i rukom khrehkaam yong ka.
Ka bru chemphang ha kani ka sngi toh ka L. Kyndiah kawa man kam ka Counselor yong ka One stop Centre Khliehriat kawa da khana chaphang uni u bru khroo, u Pandit Deendayal Upadhyay uwa da kha ha ka 25 tarik u Naikhynde 1916 ha ka chnong Nagla Chandrbhan hajan Farah ha Mathura District. U Pandit Deendayal Upadhyay da man u uwi u bru wa chemphang ha ka thoh ka thar, man u u bru wa maya ya ka bei rymaw, man u u bru uwa kheiñkor yei yoh i kot. Wei ka sorkar leh da pynmih ko ya ki jait e sikai ha i pyrtuid yong uni. Da em ka Train Station leh kawa da booh hei pyrthuid yong oo.
Ya ki kyntien pynwai da e da ka F. Liam, ki kyntien e khublei da e da u Headmaster kani ka skur wei ha kani ka yalang ki khynnah skur da em ki hadooh 50 ngut.
