Ka KSU South West Khasi Hills District hapoh i yahkhmt u Shemphang Nonglang (Vice President KSU South West Khasi Hills District) wa u Jiedskhem Nongsiej (General Secretary KSU South West Khasi Hills District) ryngkat ki dkhot na ki Circle waphær waphær ynnin ka sngi da hiar ki cha Domiasiat wow lai booh syntu ha u loom-tlep yong ka men Spility Lyngdoh Langrin.
Neiliang ka seiñ ya kani ka sngi da kynmoo warom ya ka kam “Ka Sngi Pyrchah Uranium’ neibhah kani ka men toh kawi kawa da yah yei yakhih wow pyrchah yei tih Uranium ha ka thaaiñ kam ka tre khyndaw deiwa kyntait leh hadooh ka sngi wa khlaad noh ya ka spah klur wa da tyrwa da ka UCIL neibynta wow e laad wow tih Uranium ha Domiasiat.
Ha kani ka sngi, ka seiñ kam chibynta yong ka lyngkhooh snem wa ar yong ka sngi wa khlaad ka men Spility da wah chwa ki da ki Banner ha kylleiñ ki bynta ka yaaw Mawkyrwat heiwa da pynsñiaw cha ki paidbah ka thaaiñ wymtoh u mylliñ ya ka Men Spility kawa da pynman ya ka South West Khasi Hills District wow man kamni kat hadooh wa ka sorkar wa ka UCIL ym nood de ki wow wan chaphrang wa ini i thmu.
Hadien ini neiliang ki heh ka seiñ wa ki dkhot da hiar ki wow booh syntu ha u loom-tlep ha chnong Domiasiat. Ka seiñ da ong ko wa ka Men Spility Lyngdoh Langrin da man ko kam u chrot wa skem wa kyrchaan wei pynskem ya ka yurim wow pyrchah Uranium heiwa kam ka seiñ hi u pyrchah ko yeini kat hadooh wa kut ki sngi.
