Ki bor pait bor pynlai ka R.C. Eve School Mihmyntdu kam kawi na ki chlem e sikai ya ki khynnah wa wan na ki manyung mansem wa ban i dooh i tymbuiñ, ynne ka 14 tarik ha ka thong wow pynkmen pynka-it ya ki khynnah da lehwarom ki ya ka lyngkhooh snem sngikha u Pandit Jawaharlal Nehru kawa tip leh kam ka Children’s Day.
Ha ka yalang yong kani ka sngi hei sakhilang u P. Joshi, uwa mihkhmat ya ka Max Cement Nongsning, East Jaiñtia Hills chirup i emlang u E. Pale, ka Sister Pushpita wa kiwa sikai da yoh i klam yahkhmat hajrong ka thong yong kani ka sngi na ka Tina Lakiang, Secretary SMC R.C. Eve School Mihmyntdu.
U P. Joshi hawa klam da e mynsien u ya ki khynnah wym toh u dooh kyrmen næ u booh dei kutlaad hawa im hanla ban i dooh i duk wei hap u kreh chitom neibhah i im toh ka luti wow hap u tynjooh yei eh i khoo wa boonjait hei im yong i ki bru kamtæ emkaam u kut yumut i wow jop yeitæ i eh waroh hadien yow yoh u chem yei suk.
Neiliang u P. Joshi kam chibynta wow pynkmen pynka-it ya ki khynnah skur ka R.C. Eve School Mihmyntdu ha kam kani ka sngi, da e sñiawbha u leh ya ki dei baam wei da kular u leh wa katwa ye wajoh i bor u e yarap u cha kani ka skur neibynta i myntoi ki khynnah.
Chooh chooh ha kani ka sngi da pynnwyrngia leh ya ki khynnah da ki chaad, ki rwai na kiwa sikai wa i pynman ya ki yakob waphær kam ka Baloon Race, Marble Race, ka yataan tylle wa kiwi kiwi.
