Kawi na ki Club chnong kawa tip kam ka Rumshnong Youth Club Bataw wa da seiñ da ki manchwa ha ka 03-01-1967, da kymmoo maya ko ya kiwa seiñ yong ka kamjooh ya kiwa kitkaam wa hakhmat neibynta u snem 1967 hadooh 2020 deiwa pynman ya ka yalang pynkup burom namo ka Felicitation Programme ha ka 24 tarik uni u bnai ha Community Hall yong ka Club.
Ha kani ka sngi da wan ya chimbynta da u Kyrmen Shylla u MLA ka thaaiñ kamjooh u Montri sorkar kam u kongsan wa u Dr. Sankey Shangpung, u MDC ka thaaiñ uwa man leh kam u Chairman ka JHADC kam u symbood kongsan deiwa wan synran lang wei kamjooh uwa de ya ki kyntien kyntu kynpham ha kani ka sngi, u Lasky Rymbai, uwa man leh kam u Deputy CEM ka JHADC deiwa emlang u Finelyness Bareh, MDC Khliehriat uwa man leh kam u EM I/c Elaka ka JHADC.
Da emlang leh u Waheh Chnong ka chnong Bataw, u Shemi Rupsi uwa da pdiang burom ya ki kongsan, kiwa chah khut sñiawbha wa waroh kiwa da wan cha kani ka yalang.
Da booh leh ya u mooyurim ya kiwa seiñ ya ka Club uwa da wai da u Kyrmen Shylla.
Ya ka yalang da pynlai da u President ka Club, u Deihok Sumer deiwa emlang waroh kiwa yahkhmat ka Club, kiwa kitkaam chnong wa kynthup ya u Skem Sumer, Assistant Waheh Chnong, u Hostin Pajat, Secretary Chnong wa ki dkhot chnong kamjooh ki manbei manpa kiwa da chah khut sñiawbha cha ka yalang.
U kongsan hawa e yei klam yong oo da yaroh u ya kiwa yahkhmat ka Club wa da ye ki u pynman ya kam kani ka jait yalang yow kynmoo maya ya kiwa seiñ yong ka Club wei kamjooh leh ya kiwa yahkhmat hadien habood, deiwa ong wa da man ko leh ka parom hiar pateiñ wow sah kymmoo ya ki pateiñ wow wan yow tip ki ya kiwa booh ki longchwa manchwa.
Da ong u leh wa kam uwa mihkhmat paidbah katwa chah i bor yong oo da leh u ya ki kaam pynroi pynpaar hapoh ka Constituency yong oo heipor wa tbian wa yoh u chakri neidaw wa em ka kjut khlam COVID-19 kawa ktah yei kaam pynroi kamwa duna 2 snem, tangwa i chah pynbaad u em bait ko ha i kaam chakri paidbah.
Da kyntu u leh ya ki paidbah u man ki kiwa ya krehlang wa kiwa yahkhmat ka Club kamjooh da kular u wow pait yei emkaam ka Club kawa da booh ya ka dorkhat wow yarap ya ka Club heiwa da paan u leh yei kyrchaan na ki paidbah kam u khynroo uwa yahkhmat ya ka Constituency yoh u yohlaad u pyndep lut yei thmu yong oo u pyndep wow chakri neibynta i bha yong ki paidbah hapoh Khliehriat waka District hi waroh kawi.
Neiliang u Dr. Sankey Shangpung da ong u wa i em yong kiwa yahkhmat kiwa thrang sakhiat wow chakri hok ya ki paidbah nadooh mynsien man ko kawa emkaam hadooh kattæ kattæ u yoh da kiwa stat wei wa chemphang ya ka kaam yow man ki kam ka nongmuna wa bha heiwa ki paidbah da embhah ki hawa yoh ya kiwa yahkhmat ka Club neibhah ki kaam yong ki klam ko chiboon bar ya i ktien.
Da pynwyrngia ya kani ka sngi da ki chaad tynre na ki khon khynnah skur ka Bataw U.P. School.
Kiwa seiñ ya ka Club kiwa dang neh dang sah heini ha sla pyrthai kiwa da chah pynkup burom toh u Odingson Biam, Founder General Secretary, u Roland Suchen, Founder Secretary, u Bidro Suchen, Founder EC Member wei uwa da man leh hadien kam u Chairman, u Kyrshan Sumer, Founder EC Member, u Kmen Rymbai, Founder EC Member katwa ya kiwa seiñ kiwa da khlaad neini na sla pyrthai da pynman yei suki wa chi minit kam ka dak wow kymmoo warom ya ki hanla ym emlang de ki chirup waka Club.
Ki yahkhmat wa hadein kiwa da chah pynkup burom toh u Willing Sumer, Ex-General Secretary, u Bilan Suchen, Ex-Chairman, u Rimiyoo Lamare, Ex-General Secretary, u Onickson Sumer, Ex-General Secretary, u Pyrkhatbha Rupsi, Ex-Chairman, u Taltis Sumer, Ex-President, u Hemi Rupsi, Ex-General Secretary wa u Edward Lamare, Ex-Convener.
