Ynne ka 5 Naiynru kawa man ka sngi kyrpang wow pynneh pynsah ya ka rymaw, ka STIEH da lehwarom ko ya kani ka sngi deiwa thung 10 tre u Dieñrai namo u Michelia Champaca ha ka chnong Umkiang, East Jaiñtia Hills.
Ka STIEH da kyntu joor ko ya kiwi wow yaleh ki u thung dieñ ymtoh du ynne ka sngi tangwa heiwon iwon i por leh katwa dang biang ka samoi wow thung neibhah ka rymaw kawa yirngam toh kawa emkaam bha ki bru yow yoh ki ya ka la’ær kawa khooid.
Da ong wa lada dooh ya ka rymaw wa ka la’ær wa khooid, ini daw booh i ya ki bru ha i maa neibhah ki dieñ pynkhooid ki ya ka la’ær wei pynmih ki khamtam ya ka Oxygen wa riñ mynsien ki bru.
Ka seiñ da kyntu joor ko khamtam wow sangeh noh wow pynsih u pynjæd ya ka Bei Ramaw da ki kaam wa boonjait nadooh i pam khiar ya ki dieñ hadooh wow dai ya ka khloo cha ki karkhana wa boonjait neibynta i myntoi samen.
Ka STIEH da e khublei ko leh ya ka yung krehkaam u B. Amrynsong u Forest Ranger, Umkiang uwa da e sñiawbha ya kini ki tre dieñ.
