Jowai: Ka Tuber Wah Chnong Cultural Club Tuber Kmai Shnong dei kyrchaan uwi na ki waheh ka dong, u Graham Lyngdoh da pynman ko ya i thung dieñ ynne ka sngi kam chibynta wow ksoh-kti lang wa ka sngi pynneh pynsah ya ka Rymaw namo ka ‘World Environment Day’.
Ya kini ki tre dieñ kiwa em 150 tre da thung ha i thaw yong ka Club deiwa chimbynta da Ki khon yong ka dong waroh.
Chwa wow sdang yei thung dieñ da pynman ya ka yalang wa tbian hakhmat ka yung Club deiwa bood ryntih ya ki kyndon yong ka sorkar neidaw ka khlam u COVID-19.
Ya kani ka yalang da pynlai da u J. Phawa uwa man leh u Chairman ka Club, heijooh i por da yoh ya ki kyntien sneiñ kyntu wa kammon u sumaar wei wow burom ya ka rymaw wow yoh ya ka la’ær wa ka um kawa khooid wa jngiar da u Helpme Lyngdoh u Secretary ka Club, u Tanbok Dkhar wa na u Graham Lyngdoh.
Chwa wow kut ka yalang da mynjur lang da waroh ki khon ka dong wow raikut ki wow pynneh pynsah yei yirngam ka Bei Rymaw.
