Ka Sarot I Man kawa ya krehlang 11 ngut chilok wow krehmon sñiawbha neibynta ka imlang sahlang, ha ka 27 tarik da li e yarap ko cha NEIMA Sahsniang, ka thaw ri ya ki khonswet.
Ha ka yalang tbian, da yoh yei pdiang burom chwa ya ka Sarot I Man da u Rev. B.D. Shangdiar, uwa pynsñiaw yeitæ i mynsien wakmen hadooh kattæ kattæ yeiwan kini ki chi lok yow tipmit ya kani ka thaw ri ya kini ki khynnah, “Ha i, ym em u kheiñ ya ki kam ki khonswet, neibhah lada ong ya ki toh ki khonswet, ki wym em bei em pa næ kiwa ri wa sumaar ya ki; neibhah heini daman bei man pa ya ki da i, man ki kam ki khon yong i, e i chakri ya ki iwa paka tam ha waroh ki liang”.
Hadien neitæ da e kti u ha u Chairman wou pynlai ya kani ka yalang, u Wh. Phrang Sngi Challam. Da yoh ya ki kyntien ngoohblai na u Sienmitre Sumer, pynbood sa i pyntipmit ya uwi pa uwi ki dkhot ka Sarot I Man neitæ sa i klam na u Wh. Shape Pasweth wa i kyntien e khublei na u Wombai Sumer.
Hei klam yong u Shape Pasweth, da khana u ya ka parom yong ka Sarot I Man nadooh wa sdang hadooh wa poi ha kini ki sngi, i lai luti yong ka heijooh i por ya ki kaam wa dadep kreh ko. Da ong u ya ki khynnah wa ri ha ka NEIMA, “Kynmoo wa i dang nachwa, ka bei wa u pa yong i ymjooh tip ki u ong ya i yoh i’u kheiñkor ya i por. Tangwa katni, manda ha i, datip i u ong ya ki khon yong i wa i por toh iwa kordor tam hadooh kattæ kattæ; kamjooh yaphi kiwa ap yeini i kyntien klam. I akor i burom toh u man i wa hakhmat dooh chirup chirup wei sikai yong uni u khñiang Corona, watoh u lehkhooid yei doh i pran yong i, khamtam ki kti toh u sait bha hachwa wa manda dep kreh ya ki kaam”. Da kyntu joor u ya ki khynnah, wymhoi u myllieñ ki leh u yabood yei puræ puthi, katwa kani ka thaw wa pait wa ri ya ki dang pynlai ko ya ki. Burom ya kini kiwa em ha NEIMA wa man ki kam ki bei ki pa yong phi ha waroh ki liang, ong u Shape.
Hadien neitæ da yoh ya i saam ya ki sula wa i baam cha ki 19 ngut ki khynnah wa em hapoh i pait i yoo ka NEIMA, Sahsniang da kiwi tawon ki dkhot ka seiñ. Da yoh ya i klam chwa wow pynkut na u Rangbah W.T. Talang, Vice Chairman uwa da man leh kam u Chairman ka NEIMA ha u snem 2022. U Talang da ong u, wa ka kyntien u Blai leh ong ko, “Heipor wa kordit wa kyrdooh bha, wa emkaam i dawa, lada i tip i ya oo; i yarap daw wan ko, dei wym poi pyrkhat neiwon ræ neiwon” ynne man sakhiat kitæ ki kyntien kiwa phi ka Sarot I Man wan phi heipor wa emkaam bha, iwa dawa bha ya kini ki khynnah. Kamtæ ym sñiaw yoh kyntien de u e khublei ya phi yeini i wan yong phi; To u Blai yoh u emlang waphi waroh ki dkhot yong kani ka seiñ, kiwa chynna jngai wow yarap kamni, yoh u thæh i kyrkhu kyrdoh ha phi ha waroh ki liang.
Da pynkut u Chairman ya ka yalang deiwa yoh yei duwai na u Rev B. Shangdiar hachwa u ya dihcha wa i chondur lang ha pchem yong ka NEIMA.
