Jowai : Ynne ka sngi 8 tarik heipor chi waje chiteiñ sngi le ngut ki damok wa ymtip kiwa neiwon da psiah ki hapoh ka Punjab National Bank, Saipung Branch kawa em ha Saipung, East Jaiñtia Hills wei da yoh ki u lute hadooh T. 1,27,000 na kani ka bank.
Kini kiwa lute waroh rah pistol ki, wei da tymmoh yei khmat yong ki da ki mask. Kiwa kreh ka bank ong ki wa em le ngut wa psiah katwa kamwa ar ngut kiwa yang ha lait. Hadien wa psiah ki hapoh kani ka bank da siat ki ar kuli cha suiñ wei da maham ki leh ya kiwa kreh wa em 5 ngut wa ki kattu katni ngut kiwa wan emkaam ha kani ka bank wa ym hoi u awri ki.
Da phah wai ki leh ya ka ‘Safe’ wa booh poisa tangwa heini i por hapoh ka bank ym em u Branch Manager uwa ksoh yow chabi yong kani ka Safe. Kamtæ da chim ki ya ka poisa wa T. 1,27,000 wa dang dep thap wot uwi u bru uwa jooh pyllang poisa heini.
Hadien ini kini ki damok da yut ki dei kjat na kani ka bank wei katkam i ong kiwa sakhi da ong wa da siat biang ki sa ar kuli chwa u yut ki dei kjat cha ka khloo wa em hajan. Da ong wa wan ki cha kani ka bank dei kjat.
Da ong leh kini kiwa lute klam ki dei ktien dkhar “Hindi” tangwa ym em pliah ki u klam yeini ktien.
Kani ka Bank em ko hajan ka ophis u BDO Saipung Block kawa 5 Km jngai na ka chnong wa sah ki bru.
Da ong leh wa kini ki bru kiwa psiah chapoh ka bank da sap ki leh da ki sula chipai. Ki pulit da register ki da ka case wei dang takit ki yeini.
Discussion about this post